10 Apr 2019, 10:35
އަލިފާން ރޯވެ ގ. ރެޑްޕާލްގެ ތިން ފަންގިފިލާ، ދިރިނޫޅެވޭ ވަރަށް އަނދައިފި އެވެ.
އެމްއެންޑީއެފް އިން މިއަދު ބުނީ އެ އެގޭގައި އަލިފާނުގެ ޙާދިސާއެއް ހިނގައިގެން އުޅޭ ކަމުގެ މަޢުލޫމާތު ރިޕޯޓްކޮށްފައި ވަނީ ރޭ ފަތިހު 03:45 ގައި ކަމަށެވެ. އަދި ފަތިހު 04:35ގައި އެ އަލިފާންގަނޑު ނިއްވާލައިފައިވާ ކަމަށް ވެސް އެމްއެންޑީއެފްއިން ބުންޏެވެ.
އެމްއެންޑީއެފް އިން ބުނީ އަލިފާން ރޯވުމުގެ ސަބަބުން އެ ގޭގައި ދިރިއުޅެމުން ދިޔަ ހަތް މީހަކަށް ދުމުގެ އަސަރުކޮށް، އައިޖީއެމްއެޗުގައި އެމަޖެންސީގައި ފަރުވާދިން ކަމަށެވެ. ނަމަވެސް މިހާރު އެ އެންމެންގެ ހާލު ވެސް ރަނގަޅު ކަމަށް އެމްއެންޑީއެފް އިން ބުންޏެވެ.
އެމްއެންޑީއެފް އިން ބުނީ، އެ އެގޭގައި އަލިފާން ރޯވެފައި ވަނީ އެ ގޭ ދެ ވަނަ ފަންގިފިލަ އަށް އަރަން ހުންނަ ލަކުޑިން ހަދާފައިވާ ހުރި ސިޑިއެއްގައި ކަމަށެވެ.
އެގޭގެ ތިން ފަންގި ފިލަ އަށް އަލިފާނުގެ އަސަރު ކުރުމާ ގުޅިގެން އެ ތަންތަނުގައި ދިރިއުޅުނު 10 މީހަކު ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ އިން ވަގުތީ ބޯހިޔާވަހިކަމާއި ކެއުމުގެ އިންތިޒާމް މިހާރު ހަމަޖައްސައިދީފައިވާ ކަމަށެވެ.