08 Apr 2019, 09:40
ރޭ އިނގިރޭސި ޕްރިމިއާ ލީގުގައި އެވަޓަން އަތުން ބަލިވެ ގަދަ ހަތަރެއްގައި ދެމި އޮތުމަށް އާސެނަލަށް އުނދަގޫތަކަކާ ކުރިމަތިލާން ޖެހިއްޖެ އެވެ.
އެވަޓަންގެ އަމިއްލަ ދަނޑުގައި ރޭ ކުޅުނު މެޗުން އާސެނަލްގެ މައްޗަށް އެ ޓީމު ކުރި ހޯދީ 0-1 ގެ ނަތީޖާ އަކުންނެވެ. އެ މެޗުން ބަލިވި އާސެނަލް ތާވަލުގެ ހަތަރުވަނައިގައި އޮތީ 32 މެޗު ކުޅެ 63 ޕޮއިންޓް ހޯދައިގެންނެވެ. ނަމަވެސް ފަސް ވަނައިގައި އޮތް ޗެލްސީ ވެސް 32 މެޗު ކުޅެގެން 63 ޕޮއިންޓް ހޯދާފައިވެއެވެ.
އާސެނަލްގެ ކޯޗު އުނޭ އެމެރީ --- ފޮޓޯ/ މެޓް ޑޯމަން
އާސެނަލަށް ދަރަޖައިގެ ގޮތުން ޗެލްސީގެ މައްޗަށް ކުރިއެރުން ލިބެނީ ފައިދާ ގޯލަށް ބަލައިގެންނެވެ. ނަމަވެސް ރޭގެ މެޗުން މޮޅުވެ ގަދަ ހަތަރެއްގައި ހަމަޖެހިލުމުގެ ފުރުސަތު އާސެނަލަށް ލިބުނެވެ. އާސެނަލް އަތުން އެ ފުރުސަތު ނަގާލި އެވަޓަން ވަނީ ރޭގެ މެޗުން ލިބުނު މޮޅާ އެކު ތާވަލުގެ ނުވަވަނައަށް ޖެހިލައިފައެވެ.
ރޭގެ މެޗުގައި ދެ ޓީމުގެ ފަރާތުން ވެސް ފެނުނީ ހަމަހަމަ ކުޅުމެކެވެ. ނަމަވެސް ދެ ޓީމުގެ ދެމެދުގެ ތަފާތަކަށް ވީ އެވަޓަންގެ ކެޕްޓަން ފިލް ޖެކިއެލްކާ މެޗުގެ ކުރީ ކޮޅު ޖަހައިދިން ގޯލެވެ.
ޕްރިމިއާ ލީގުގެ ގަދަ ހަތަރެއްގެ ވާދަވެރިކަން ބޮޑުވެފައިވާ އިރު ހަތަރު ޓީމެއް ދަނީ އެ ޖާގަ ހޯދުމަށް މަސައްކަތް ކުރަމުންނެވެ. ޓޮޓެންހަމްއާއި އާސެނަލް އަދި މެންޗެސްޓާ ޔުނައިޓެޑްގެ އިތުރުން ޗެލްސީއިން ގަދަ ހަތަރަކަށް އަރައި އަންނަ އަހަރުގެ ޗެމްޕިއަންސް ލީގުގެ ޖާގައެެއް ކަށަވަރު ކުރަމަށް މަސައްކަތް ކުރަމުން ދާއިރު ޓީމުތަކުގެ މެދުގައި ވަނީ ކުޑަ ފަރަގެކެވެ.
ބާކީ ހަ މެޗު ކުޅެން އޮތް އިރު އެންމެ މެޗަކުން ބަލިވި ނަމަވެސް ދެން ހުރި ޓީމުތަކުން އޭގެ ފައިދާ ނަގާނެ އެވެ. އަހަރުތަކަކަށް ފަހު ޕްރިމިއާ ލީގުގެ ވާދަވެރިކަން މިވަރަށް ބޮޑުވެފައިވާ އިރު އިނގިރޭސި ހަތަރު ޓީމެއް ވަނީ މިއަހަރުގެ ޗެމްޕިއަންސް ލީގުގެ ކުއާޓާ ފައިނަލަށް ވެސް ދަތުރު ކޮށްފަ އެވެ. އަދި ޕްރިމިއާ ލީގުގެ ދެ ޓީމަކަށް ވަނީ ޔޫރަޕާ ލީގުގެ ކުއާޓާފައިނަލުގައި ޖާގަ ވެސް ކަށަވަރުވެފަ އެވެ.