04 Apr 2019, 12:29

ޓޮޓެންހަމްގެ އަލަށް ހެދި ސްޓޭޑިއަމް ރަސްމީކޮށް ހުޅުވުމަށް ފަހު ކުޅުނު ފުރަތަމަ މެޗުން ރޭ ކްރިސްޓަލް ޕެލަސްގެ ގާތުން މޮޅުވެއްޖެ އެވެ.

އަންދާޒީ ހިސާބުތަކުން ދައްކާ ގޮތުން 1 ބިލިއަން ޔޫރޯއެއް ވުރެން ބޮޑު ހަރަދެއް ކުރުމަށް ފަހު ހެދި ޓޮޓެންހަމްގެ ސްޓޭޑިއަމް ރަސްމީކޮށްރޭ ހުޅުވި އިރު، ކުޅުނު ފުރަތަމަ މެޗުން އެ ޓީމު މޮޅުވީ 0-2 ގެ ނަތީޖާ އަކުންނެވެ. އެ މެޗުން ލިބުނު މޮޅާ އެކު ތާވަލުގެ ތިން ވަނައަށް ޓޮޓެންހަމް ޖެހިލި ނަމަވެސް ލީގު ހޯދުމުގެ ދޮރު މިހާރު ވަނީ އެ ޓީމަށް ބަންދު ވެފަ އެވެ.

އެންމެ ފަހުން ކުޅުން ފަސް މެޗުން ވެސް މޮޅެއް ނުލިބި ގިނަބައެއްގެ ފާޑު ކިއުންތަކެއް ލިބެމުން ދިޔަ ޓޮޓެންހަމް ރޭގެ މެޗުގައި ވަނީ މޮޅު ކުޅުމެއް ދައްކާ އެ ޓީމުގެ ސަޕޯޓަރުންގެ މޫނު މައްޗަށް ހިނިތުންވުން ގެނެސްދީފަ އެވެ.

ރޭގެ މެޗު ފެށިގެން ދެ ޓީމުގެ ފަރާތުން ވެސް ފެނުނީ ދާދި ހަމަހަމަ ކުޅުމެކެވެ. ފުރަތަމަ ހާފު އެއްވެސް ޓީމަކަށް ގޯލެއް ނުޖެހި ނިންމާލި ނަމަވެސް ދެވަނަ ހާފުގެ ކުރީ ކޮޅު ޓޮޓެންހަމްއަށް ލީޑު ނަގައި ދިނީ ދެކުނު ކޮރެއާގެ ހުނަރުވެރި ފޯވާޑް ސޮން ހެންގް މިން އެވެ. އައު ސްޓޭޑިއަމްގައި ފުރަތަމައިން ޖެހި ގޯލުގެ ޝަރަފު ލިބުމުން ސޮން އަށް ގިނަބައެއްގެ ތައުރީފީ ބަސްތައް ވަނީ އަމުނާލާފަ އެވެ.

ސޮންގެ ގޯލާ އެކު ޓޮޓެންހަމްއަށް އިތުރު ހިއްވަރެއް ލިބި ގިނަ ހަމަލާތަކެއް އުފައްދަން ފެށި އެވެ. އެ ގޮތުގައި މާ ގިނަ އިރުތަކެއް ނުވަނީސް އެ ޓީމަށް ލީޑު ފުޅާ ކޮށްދިނީ ކްރިސްޓިއަން އެރިކްސަން އެވެ. ގޯލުގެ އިތުރުން ސޮންގެ ގޯލު ޖަހަން އެސިސްޓް ވެސް ކޮށްދިނީ އެރިކްސަން އެވެ. ޔޫރަޕުގެ ބޮޑެތި ބާރު ތަކުން އެންމެ ލޯ އަޅަމުންދާ އެއް ކުޅުންތެރިޔާ، އެރިކްސަން އަންނަނީ މި ސީޒަނުގައި ތަފާތު މޮޅު ކުޅުމެއް ދައްކަމުންނެވެ.

ރޭގެ މެޗުން ލިބުނު މޮޅު ޑެޑިކޭޓް ކުރާނީ ޓޮޓެންހަމްގެ އައު ސްޓޭޑިއަމަށް ކަމަށާއި މީ ވަރަށް ގިނަ ދުވަހުގެ އުންމީދުތަކެއް ކަމަށާއި މިފަދަ ފެންވަރު ރަނގަޅު ސްޓޭޑިއަމެއް ދުނިޔޭގައި މަދުވާނެ ކަމަށް ޓޮޓެންހަމްގެ ކޯޗު މޯރީސިއޯ ޕޮޗެޓީނޯ ރޭ ގެ މެޗަށް ފަހު ވަނީ ބުނެފަ އެވެ.