03 Apr 2019, 22:03
މޯލްޑިވްސް ޓޫރިޒަމް ޑިވްލޮޕްމަންޓް ކޯޕަރޭޝަން (އެމްޓީޑީސީ) ބޯޑަށް އާންމު ހިއްސާ ދާރުންގެ ފަސް ޑިރެކްޓަރުންގެ މަގާމަށް ކުރިމަތި ލުމަށް ހުޅުވާލައިފިއެވެ.
އެމްޓީޑީސީން ބުނީ މިއީ އެމްޓީޑީސީގެ އަސާސީ ގަވައިދާއި ހިންގާ ގަވައިދާއި ރާއްޖޭގެ ޕަބްލިކް ކުންފުނިތަކުން އަމަލުކުރުމަށް ކެޕިޓަލް މާކެޓް ޑިވޮލޮޕްމަންޓް (ސީއެމްޑީ) އިން ކަނޑައަޅާފައިވާ ކޯޕަރޭޓް ގަވަނަންސްއާ އެއްގޮތަށް އެމްޓީޑީސީގެ ޑިރެކްޓަރުންގެ ބޯޑުގައި އާންމު ހިއްސާދާރުން ތަމްސީލު ކުރުމަށްޓަކައި ކަނޑައަޅާފައިވާ މަގާމުތަކެއް ކަމަށެވެ.
އެ މަގާމުތަކަސް ކުރިމަތިލުމުގެ ޝަރުތުތަކުގެ ތެރޭގައި އުމުރުން 18 އަހަރު ފުރި، އެ ފަރާތުގެ އާއިލާގެ މީހަކު ފާއިތުވި އަހަރު އެމްޓީޑީސީގައި މަސައްކަތްކޮށްފައި ނުވުމާއި ތައުލީމާއި ތަޖުރިބާ އަދި އެ ކުންފުނީގެ 50 ހިއްސާ އޮތް މީހަކަށްވުން ހިމެނެ އެވެ.
އެ މަގާމަށް ކުރިމަތިލުމަށް ޝައުުގުވެރިވާ ފަރާތްތަކުން މިމަހުގެ 22 ގެ ކުރިން މަގާމަށް ކުރިމަތިލާން ޖެހޭނެ ކަމަށް އެމްޓީޑީސީން ބުންޏެވެ.
އެމްޓީޑީސީގެ ބޯޑުގައި މިހާރު ތިއްބެވީ ޗެއާމަން އަބްދުﷲ ފާއިޒު އާއި އެމްޑީ ތަޒްމީލް އަހުމަދު އަދި ޑެޕިއުޓީ އެމްޑީ އަހުމަދު ނިޔާޒު އެވެ. އަދި އާއްމު ހިއްސާދާރުން ތަމްސީލް ކުރައްވާ ޑިރެކްޓަރުގެ ގޮތުގައި ތިއްބެވީ މުހައްމަދު ޖަނާހު އާއި އާރިފް އަބްދުއްސަމަދު އަދި އަބްދުﷲ ނިސާން އާއި އަބްދުﷲ ސައީދު އަދި އައިޝަތު ފަޒީނާގެ އިތުރުން މުހައްމަދު ފާތިހު އެވެ.