ނަޖީބުގެ މައްޗަށް ކުރި ދައުވާތަކަށް އިންކާރު ކުރައްވައިފި

03 Apr 2019, 15:58

ކުއަލަލަމްޕޫރު (އޭޕްރިލް 3): މެލޭޝިއާގެ ކުރީގެ ބޮޑުވަޒީރު ނަޖީބު ރައްޒާގުގެ މައްޗަށް ކޮށްފައިވާ ކޮރަޕްޝަނުގެ ދައުވާތަކަށް އޭނާ އިންކާރު ކުރައްވައިފި އެވެ.

ދައުލަތުގެ އިންވެސްޓްމެންޓު ފަންޑު 1އެމްޑީބީގެ ކޮރަޕްޝަނުގެ މައްސަލައާ ގުޅިގެން ނަޖީބުގެ ޝަރީއަތް މިއަދު ވަނީ ފަށާފަ އެވެ. އެއީ 1އެމްޑީބީގެ ސަބްސިޑަރީ ކުންފުންޏެއް ކަމަށްވާ އެސްއާރުސީ އިންޓަނޭޝަނަލްއިން ނަޖީބުގެ އެކައުންޓަށް 10.4 މިލިއަން ޑޮލަރު ޖަމާކުރި މައްސަލައިގެ އަޑު އެހުމެވެ.

މެލޭޝިއާގެ ބޮޑުވަޒީރު ކަމަށް ނަޖީބު ވަޑައިގެންނެވިތާ މާގިނަ ދުވަސްތަކެއް ނުވަނީސް 1އެމްޑީބީ ފަންޑު ހުޅުވީ އެގައުމުގެ ތަރައްގީގެ މަޝްރޫއުތަކަށް ފައިސާ އެއްކުރުމަށެވެ. ނަމަވެސް އެމެރިކާގެ ޖަސްޓިސް ޑިޕާޓްމެންޓުން ތުހުމަތުކުރާ ގޮތުގައި 1އެމްޑީބީ ފަންޑުން ވަނީ 4.5 ބިލިއަން ޑޮލަރު ޑައިވާޓުކޮށް، ލޯންޑާކޮށްފަ އެވެ. އަދި އެ ފައިސާ ބޭނުންކޮށްފައި ވަނީ އަގުބޮޑު ޕްރައިވެޓް ޖެޓާއި ގެތަކާއި ޔޮޓެއް ގަތުމަށެވެ. އެޔޮޓު މިއަދު މެލޭޝިއާ ސަރުކާރުން ވަނީ 126 މިލިއަން ޑޮލަރަށް ވިއްކާލައިފަ އެވެ.