27 Mar 2019, 18:51
މީގެ ދެ ހަފްތާ ކުރިން ބ. ހިތާދޫގައި އަނބު ގަހަކުން ވެއްޓުނު 53 އަހަރުގެ މީހާއަށް އަދިވެސް އައިސީޔޫގައި ދަނީ ފަރުވާ ދެމުން އަންނަ ކަމަށް އޭނާގެ އާއިލާ އިން ބުނެފިއެވެ.
މިމަހުގެ 12 ވަނަ ދުވަހު ހިނގި އެ ހާދިސާގައި އަނިޔާވެފައިވަނީ އަހުމަދު ހުސައިން ނަމަކަށް ކިޔާ މީހަކެވެ.
އަހުމަދު ހުސައިންގެ ދަރިފުޅު އަހުސަން އަހުމަދު "ސަން"އަށް މައުލޫމާތު ދެމުން ބުނީ އޭނާގެ ބައްޕައަށް މިހާރު ފަރުވާ ދެމުންދަނީ އައިޖީއެމްއެޗްގައި ކަމަށެވެ.
"އެންމެ ފުރަތަަމަ އޭޑީކޭ ހޮސްޕިޓަލްގައި ފަރުވާ ދީފަ މީގެ ތިން ދުވަސް ކުރިން އައިޖީއެމްއެޗަށް ބަދަލުކުރީ. އޭޑީކޭގައި ފަރުވަ ދެމުންދަނިކޮށް ސްޓްރޯކެއްވެސް ޖެހި މިހާރު އެއްފަޅި ވާގި ނެތިފައި އޮތީ. މިހާރުވެސް އައިސީޔޫގައި ފަރުވާދެނީ،" އަހުސަން ބުންޏެވެ.
އަހުސަން ބުނީ އޭނާގެ ބައްޕަ ވެއްޓުނު އަނބުގަހާ ބިމާ ދޭތެރޭ 30 އަކަށް ފޫޓް ހުންނާނެ ކަަމަށެވެ. އަދި އޭނާ ވެއްޓުނީ އަނބުގަސް ކުރިމަތީގައި ހުރި ޖަންކްޝަނެއްގެ މައްޗަށް ކަމަށް ވެސް އަހުސަން ބުންޏެވެ.
އެ ހާދިސާގައި އަހުމަދު ހުސައިންގެ ދެ ލޮލަށް ލޭއެޅި އެއް އަތް ބިންދައިގެން ގޮސް އަދި ނާށިގަނޑުގައި ވަނީ ރެނދުލައިފައެވެ.
"ދެ ލޮލަށް ބޭސް އަޅައި ހަދައިގެން އޭގެ ތިން ދުވަސް ފަހުން ލޮލަށް ފެންނަން ފެށީވެސް. މިހާރު ހޭ އަރައިފި. ދެން ކޮންމެވެސް ވަރަކަށް ކިޔާ އެއްޗެތި އެނގޭ." އަހުސަން ބުންޏެވެ.
އަހުސަން ބުނީ އެ ހާދިސާގައި ސީ އެމްބިއުލެންސް އައުން ލަސްވުމުން ބައްޕަ މާލެ ގަނައީވެސް އަމިއްލަ ހަރަދުގައި ކަމަށެވެ. ބައްޕައަށް އަދިވެސް އާސަންދަ ހަމަނުޖެހޭކަމަށް އޭނާ ބުންޏެވެ.
"ހިތާދޫ ހެލްތު ސެންޓަރުން އާޖެންޓް ޖަހާފަ ނެތީމަ އާސަންދަ ނުލިބޭ. ހިތާދޫ ހެލްތު ސެންޓަރުން ބުނަނީ އެހެން ނުޖެހީ މަޑުނުކޮށް ދިޔައީމަޔޭ،" އަހުސަން ބުންޏެވެ.