26 Mar 2019, 16:39
ކުރިއަށް އޮތް ރައްޔިތުންގެ މަޖިލިސް އިންތިހާބުގައި އިދިކޮޅު ޕޮރޮގްރެސިވް ކޮންގްރެސްގެ ފަރާތުން ވެސް ބޭނުން ކުރާނެ ޝިއާރަކީ "ދިވެހި ބިން ދިވެހިންނަށް" ކަމަށް އެކޯލިޝަނުން ބުނެފި އެވެ.
މަޖިލިސް އިންތިހާބުގައި އިދިޅު ކޯލީޝަންއާ އެކު މަސައްކަތް ކުރާ، ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީގެ ޝިއާރަކީ ވެސް "ދިވެހި ބިން ދިވެހިންނަށް" މި ޝިއާރެވެ. ޖުމްހޫރީ ޕާޓިން ވަނީ އެ ޕާޓީގެ އެ ޝިއާރު މިދިޔަ އާދިއްތަ ދުވަހުގެ ރޭ މާމިގިލީގައި ބޭއްވި އެ ޕާޓީގެ ލީޑަރު އަދި ރައްޔިތުންގެ މަޖިލިސް ރައީސް ގާސިމްގެ ކެމްޕެއިން ޖަލްސާގައި އިފްތިތާހު ކޮށްފަ އެވެ.
މިއަދު އިދިކޮޅު މައި ޕާޓީ، ޕީޕީއެމް އާއި ކޮންގްރެސް ޕާޓީގެ ގުޅިގެން ހ. ހުރަފާގައި ބޭއްވި ނޫސްވެރިންގެ ބައްދަލުވުމުގައި ކޮންގްރެސް ޕާޓީގެ ވަގުތީ ރައީސް އަދި ރައްޔިތުންގެ މަޖިލީހުގެ ފޮނަދޫ ދާއިރާ މެމްބަރު، އަބްދުއްރަހީމް އަބްދުﷲ ވިދާޅުވީ، "ދިވެހި ބިން ދިވެހިންނަށް" އެ ޝިއާރަކީ ޖުމްހޫރީ ޕާޓީއާއި އެ ކޯލިޝަނާ މަޝްވަރާކުރެއްވުމަށް ފަހު ކަނޑައެޅި ޝިއާރެއް ކަމަށާއި ދެ ފަރާތުން ވެސް ބޭނުން ކުރުމަށް ނިންމާފައި ވަނީ އެއް ޝިއާރެއް ކަމަށެވެ.
"އަޅުގަނޑުމެންނާއި ޖޭޕީއާ ކުރެވުނު މަޝްވާރަތަކެއްގެ ތެރެއިން ދެބައިމީހުން ނިންމި ޝިއާރެއް، މީގެ ދެ ދުވަސް ކުރިން ޖޭޕީން އެ އިއުލާން ކުރެއްވީ، ދިވެހި ބިން ދިވެހިންނަށް،" އިދިކޮޅު ކޯލީޝަންގެ އެންމެ އިސްފަރާތެއްގެ ގޮތުގައި މިވަގުތު ހުންނެވި އަދުރޭ ވިދާޅުވި އެވެ.
އަދުރޭ ވިދާޅުވީ، އެ ޝިއާރަކީ ޖުމްހޫރީ ޕާޓީގެ އެކަނި ޝިއާރެއް ނޫން ކަަމަށާއި އިދިކޮޅު ކޯލިޝަންގެ ތާއީދާ އެކު މަޖިލީހަށް ވާދަ ކުރާ ހުރިހާ ކެންޑިޑޭޓުން ވެސް މަސައްކަތް ކުރައްވާނީ އެ ޝިއާރުގެ ދަށުން ކަމަށެވެ.
މިއަދު ޕީޕީއެމް ޕީއެންސީން ބޭއްވި ނޫސްވެރިންގެ ބައްދަލުވުމުގައި އަދުރޭ ވާހަކަ ދައްކަވަނީ: އޭނާ ވިދާޅުވީ، އެ ކޯލިޝަނުން ވެސް މަޖިލިސް އިންތިހާބުގައި ބޭނުން ކުރައްވާނެ ޝިއާރަކީ "ދިވެހި ބިން ދިވެހިނަށް" ކަމަށް -- ސަން ފޮޓޯ/ އަހްމަަދު އަވްޝަން އިލްޔާސް
އަދުރޭ ވިދާޅުވީ، އިދިކޮޅު ކޯލިޝަނުން އަބަދު ވެސް މައްސަކަތް ކުރަމުން ދަނީ، ދިވެހި ގައުމުގެ ހައްގުގައި ކަމަށެވެ. އެގޮތުން ކުރީއްސުރެ ވެސް އެބޭފުޅުން މަސައްކަތް ކުރަމުން އައި "އެންމެ ފުރަތަމަ ދިވެހި ގައުމު" އެ ޝިއާރުގެ ދަށުން ކަމަށް ވެސް އަދުރޭ ފާހަގަ ކުރެއްވި އެވެ.
ދެ ޝިއާރަކީ ވެސް އެއް މާނައެއް އެކުލެވޭ ޝިއާރެއް ކަމަށާއި އެ ދެ ޝިއާރު ވެސް އިދިކޮޅު ކޯލިޝަނުން ބޭނުން ކުރައްވާނެ ކަމަށް އަދުރޭ ވިދާވި އެވެ.
އިދިކޮޅު ކޯލިޝަންގެ ކެންޑިޑޭޓުން އެހާ ބޮޑު ކެމްޕެއިނެއް ނުކުރަނީ ކީއްވެގެންތޯ ސުވާލު ކުރުމުން އަދުރޭ ވިދާޅުވީ، އެންމެ ބޮޑު ދައްޗަކީ ކޯލިޝަންގެ ލީޑަރު އަދި ކުރީގެ ރައީސް އަބްދުﷲ ޔާމީން އަބްދުލް ގައްޔޫމު ބަންދެއްގައި ހުންނެވުމުން ކަމަށެވެ.
ރައީސް ޔާމީންގެ އެކައުންޓްތައް ފްރީޒް ކުރުމާއި ދައުލަތުން ޕީޕީއެމް އަށް ލިބެން ޖެހޭ ފައިސާތައް ނުލިބުމަކީ ވެސް ކެމްޕެއިން އެކަށީގެންވާ ގޮތެއްގައި ކުރިއަށް ނުގެންދެވޭ ސަބަބެއް ކަމަށް އަދުރޭ ވިދާޅުވި އެވެ.
އަންނަ މަހު ހަ ވަނަ ދުވަހު ބާއްވާ މަޖިލިސް އިންތިހާބުގައި އިދިކޮޅު ކޯލިޝަންގައި ހިމެނޭ ޕީޕީއެމް އަދި ކޮންގްރެސް ޕާޓީގެ ފަރާތުން ވާދަ ކުރަނީ 49 ދާއިރާ އަކަށެވެ.
އެ ކޯލިޝަނާ އެކު މަޖިލިސް އިންތިހާބުގައި މަސައްކަތް ކުރާ ޖުމްހޫރީ ޕާޓީގެ 32 ކެންޑިޑޭޓަކަށް އެ ކޯލިޝަނުން ތާއީދު ކުރެ އެވެ. އަދި ޖުމްހޫރީ ޕާޓީގެ ފަރާތުން އިދިކޮޅު ކޯލިޝަންގެ 26 ކެންޑިޑޭޓަކަށް ތާއީދު ކުރެ އެވެ.