23 Mar 2019, 23:42
ރައްޔިތުންގެ މަޖިލީހުގެ އިންތިޚާބުގައި ވާދަކުރައްވާ ބޭފުޅަކީ މިލިއަނަރަކަށްވުމުން މަސްލަހަތު ފުށުއަރާ ކަމަށް ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
މާފަންނު މަދަރުސާގައި މިރޭ ބޭއްވި އެމްޑީޕީގެ ޓިކެޓުގައި ތިލަންދުންމަތީގެ ދާއިރާތަކަށް ވާދަކުރައްވާ ކެންޑިޑޭޓުންގެ ކެމްޕެއިން ޖަލްސާގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ މަޖިލީހަށް ކުރިމަތިލައްވާ ބޭފުޅުންނަކީ މިލިއަނަރުންނަށް ވީމަ އެއީ މަސްލަހަތު ފުށުއަރާ ހިސާބު ކަމަށެވެ.
އެމަނިކުފާނު ވިދާޅުވީ އެމްޑީޕީގެ މަޖިލިސް މެނިފެސްޓޯ އެޖެންޑާ 19 ބުނަނީ ރިސޯޓުގައި މަސައްކަތް ކުރާ ކޮންމެ މުވައްޒަފަކަށް ވެސް އެންމެ ކުޑަ އުޖޫރަ ކަނޑައަޅާނެ ކަމަށެވެ.
ރިސޯޓުތަކުގައި ބިދޭސީ މުވައްޒަފުން ގެންގުޅެނީ އަޅުންގެ ގޮތުގައި ކަމަށާއި ދިވެހި މުވައްޒަފަކަސް، ބިދޭސީ މުވައްޒަފަކަސް ލިބޭނެ އެންމެ ކުޑަ އުޖޫރަ އެޖެންޑާ 19 ގައި ކަނޑައަޅާފައިވާނެ ކަމަށެވެ.
މިލިއަނަރުން މަޖިލިސް އިންތިޚާބުގައި ވާދަކުރެއްވުމަކީ މަސްލަހަތު ފުށުއަރާ ކަމެއް ކަމަށް ރައީސް ނަޝީދު ވިދާޅުވެފައި މިވަނީ މަޖިލިސް އިންތިޚާބުގައި ވާދަކުރައްވަންވީ މިލިއަނަރުން ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހީމް އިއްޔެ ވިދާޅުވެފައި ވަނިކޮށެވެ.
އދ. ދިގުރަށުގައި އިއްޔެ ބޭއްވި ޖަލްސާއެއްގައި ގާސިމް ވިދާޅުވީ މަޖިލިސް މެމްބަރުންގެ ގޮތުގައި ފުދުންތެރިން ތިބޭނަމަ ރިޝްވަތު ނުނަގާނެ ކަމަށެވެ.