21 Mar 2019, 13:25
ލޯނު އެހީގެ ދަށުން ރާއްޖެ އިން ބޭރުން މަތީ ތައުލީމާއި ތަމްރީން ހާސިލުކުރުމުގެ ފުރުސަތު ހުޅުވާލައިފި އެވެ.
އެކަމާ ގުޅޭ ގޮތުން ނޫސްވެރިންނަށް މައުލޫމާތު ދެއްވަމުން ހަޔާ އެޑިއުކޭޝަން މިނިސްޓަރު ޑރ. އިބްރާހިމް ހަސަން މިއަދު ވިދާޅުވީ ރާއްޖެ އިން މަތީ ތައުލީމު ހާސިލްކުރެވެން ނެތް، އެ ދަރިވަރަކު މަތީ ތައުލީމު ހާސިލްކުރަން ބޭނުންވާ ކޮންމެ ދާއިރާއަކުން ތައުލީމު ހާސިލްކުރުމަށް ފުރުސަތު އޮންނާނެ ކަމަށެވެ.
"މިފަހަރު ލޯނު އެހީގެ ދަށުން ރާއްޖެ އިން ބޭރުން ޕީއެޗްޑީއަށް ކިޔެވޭނެ. އަދި ވަކި ހާއްސަ ދާއިރާތަކަށް ފުރުސަތު ރިޒާވްކޮށްފައި ވާނެ. އެއީ ރާއްޖެއަށް ވަރަށް ބޭނުންތެރި ދާއިރާތަކެއް. އޭގެ ތެރެއިން ބައެއް ދާއިރާތަކަކީ ސައިކޮލޮޖީ އޮކިއުޕޭޝަނަލް ތެރަޕީ އަދި ސްޕެޝަލް އެޑިއުކޭޝަން،"
މިނިސްޓަރު ވިދާޅުވީ ކުރިއާ ހިލާފަށް މިހާރު ތައުލީމު ހާސިލްކުރަމުންދާ ދަރިވަރުންގެ ތައުލީމު ފުރިހަމަކުރުމަށް ޓަކައި ލޯނު ސްކީމުން ފުރުސަތު ލިބިގެންދާނެ ކަމަށާއި ލޯނަށް ހުށައަޅާ އިރު ކިޔެވުމުގެ 50 އިންސައްތަ ފުރިހަމަކޮށްފައި އޮންނަން ނުޖެހޭ ކަމަށެވެ.
"އަލަށް ކިޔަވަން ފަށާ ދަރިވަރަކަށް ވެސް އޭނާ އަށް ފައިސާގެ ދަތިކަން ކުރިމަތިވެފައިވާ ނަމަ އެ ލޯނު ސްކީމުން މާލީ އެހީތެރިކަން ދިނުމަށް ވަނީ ނިންމާފައި،"
މިނިސްޓަރު ވިދާޅުވީ ސާކް ގައުމުތަކުގެ އިތުރުން ފިލިޕީންސް، ޗައިނާ، ތައިލޭންޑް އަދި މެލޭޝިޔާގައި ކިޔެވުމަށް ލޯނު ސްކީމަށް ކުރިމަތިލެވޭނެކަމަށެވެ. އަދި "އެ ގައުމުތަކުގެ އިތުރުން ވަރަށް ގިނަ ގައުމުތަކުގައި ތިބި ދަރިވަރުންނަށް އޮން ގޮއިންގެ ކުދިންގެ ގޮތުގައި ލޯނު ސްކީމުން ފުރުސަތު ފަހިވެގެންދާނެ" ކަމަށް ވެސް މިނިސްޓަރު ވިދާޅުވި އެވެ.
އޭގެ ތެރޭގައި ޗައިނާ، ފިލިޕީންސް ތައިލޭންޑް، މެލޭޝިޔާ، ޗެކް ރިޕަބްލިކް، ރަޝިޔާ، ކިރިގިސްތާނު، އުޒްބަގިސްތާނު އަދި ޔޫކްރެއިން ހިމެނެ އެވެ.
މިނިސްޓަރު ވިދާޅުވީ ލޯނު ދައްކަން ފައްޓަން ޖެހޭނީ ކިޔަވާ ނިމިގެން އެނބުރި ގައުމަށް އައިސް ހަ މަސް ފަހުން ކަމަށެވެ.
މިއަދު އިއުލާންކުރި އެ ލޯން ސްކީމުން 242 ފުރުސަތު ވަނީ ހުޅުވާލައިފަ އެވެ. އެއީ 54 މިލިއަން ރުފިޔާގެ ލޯނު ސްކީމްގެ އެހީއެކެވެ.
މިއަދު އިއުލާންކުރި އެ ލޯން ސްކީމުން ރާއްޖެ އިން ބޭރުން ތައުލީމް ހާސިލްކުރުމަށް ހުޅުވާލީ ޑިޕްލޮމާ، ޑިގްރީ، މާސްޓާސް އަދި ޕީއެޗްޑީއަށެވެ.
އޮންލައިންކޮށް އެޕްލައި ކުރުމަށް މިހާރު ހުޅުވާލައިފައިވާ އިރު ލޯނަށް ހުށައެޅުމުގެ ފަހު ތާރީހަކީ އަންނަ އޭޕްރިލް މަހުގެ ނިޔަލަށެވެ.
ރައީސް އިބްރާހިމް މުހައްމަދު ސާލިހްގެ ސަރުކާރުން މީގެ ކުރިން ވަނީ މަތީ ތައުލީމް ހާސިލްކުރުމަށް 318 ފުރުސަތު ދީފަ އެވެ.
ސަރުކާރުގެ ވައުދުގެ ދަށުން މަތީ ތައުލީމު ހާސިލް ކުރުމަށް ދޫކުރާ ލޯނުގެ އިންޓްރެސްޓް ތިން ޕަސެންޓަށް ކުޑަކޮށް ލޯނު ދައްކާ މުއްދަތު މިހާރު ވަނީ އިތުރުކޮށްފަ އެވެ.