12 Mar 2019, 15:28
ކްރޫޒްލައިނާތަކަށް ހާއްސަ ޓާމިނަލެއް އެޅުމަށް މަސްވެރިންގެ ޕާކު ބަންދު ކުރަން ނިންމައިފިއެވެ.
މާލެ ސިޓީގެ ތަރައްގީއަށް ކުރަން ނިންމާފައިވާ މަސައްކަތްތައް ރައްޔިތުންނާ ހިއްސާކުރުމަށް ރޭ ސިޓީ ކައުންސިލުން ބޭއްވި ބައްދަލުވުމުގައި މާލޭ ސިޓީގެ މޭޔަރު ސިފާ މުހައްމަދު ވިދާޅުވީ މަސްވެރިންގެ ޕާކު ކުރިއަށް އޮތް ދެ ދުވަހެއްގެ ތެރޭ ބަންދު ކުރާނެ ކަމަށެވެ. އަދި އެތަން ތަރައްގީ ކުރާނީ އާންމު ފާހާނާތަކާއެކު ކްރޫޒް ލައިނާތަކަށް ހާއްސަ ކޮށްގެން ކަމަށް ވެސް ސިފާ ވިދާޅުވިއެވެ.
ސިފާ ވިދާޅުވީ އެ ސަރަހައްދު ތަރައްގީކުރާނީ މާލެއަށް ޒިޔާރަތްކުރާ ފަތުރުވެރިންނަށްވެސް ބޭނުން ކުރެވޭނެފަދަ ގޮތަކަށް ކަމަށެވެ. އަދި އެތަން ތަރައްގީކޮށް ނިމުމުން ކްރޫޒްލައިނާތަކުން މާލެ ފައިބާ ފަތުރުވެރިންނަށް ފުރިހަމަ ހިދުމަތްތަކެއް ދެވޭނެ ކަމަށްވެސް އޭނާ ވިދާޅުވިއެވެ.
މާލޭގައި ބޭނުން ކުރަން ރަނގަޅު ފެންވަރެއްގެ އާންމު ފާހާނާ ނެތުމަކީ އަބަދުވެސް ޝަކުވާއެކެވެ. މި ތަން ތަރައްގީ ކުރުމާއެކު އެ މައްސަލައަށް ހައްލެއް ލިބޭނެ ކަމަށް ޝިފާ ވިދާޅުވިއެވެ.