04 Mar 2019, 12:02
ހދ. ކުޅުދުއްފުށީގައި އެއާޕޯޓް އެޅުމަށް ކުޅި ހިއްކުމުން އެތަނަށް ލިބުނު ގެއްލުންތަކުގެ ބަދަލުގައި ކުރީން އޮތް ގޮތަށް އަލުން އިއާދަކުުރުމަށް ބޭރުގެ ފަންނީ މާހިރުންގެ ލަފާ ހޯދަން ނިންމައިފިއެވެ.
އެންވަޔަރަމަންޓްގެ ސްޓޭޓް މިނިސްޓަރު އަބްދުﷲ ނަސީރު ވިދާޅުވީ ކުޅި ހިއްކުމުގެ ސަބަބުން އެތަނަށް ބޮޑެތި ބަދަލުތަކެއް އައިސްފައިވާ ކަމަށެވެ. އެގޮތުން އެތަން ހިއްކުމުން މިހާރު މޫދާ ގުޅިފައި އޮތް ބައި ވަކިވެފައިވާ ކަން ވެސް އޭނާ ފާހަގަކުރެއްވިއެވެ.
"ވަރަށް ގިނަ ފަރާތްތަކަކުންވެސް އަޅުގަނޑުމެންގެ ކައިރީގައި އެބަ އެދެމުންދޭ އެތަން އަލުން އިއާދަކުރަން. އެކަން ކުރެވޭނެ ގޮތްތައް އަޅުގަނޑުމެން އެބަ ޖެހޭ ބަލަން. އަޅުގަނޑުމެންގެ މަގްސަދަކީ އެކަން ކުރުމަށް ބޭނުންވާ ވަސީލަތްތައް ދެނެގަނެ އެކަން ކުރެވޭނެ ގޮތް ހޯދުން. ބޭރުގެ ފަންނީ ބޭފުޅުންގެ އެހީ ހޯދުމަށް މިހާރު ރާވަމުންމިދަނީ." އޭނާ ވިދާޅުވިއެވެ.
ސަރުކާރުން ލަފާ ހޯދަނީ އަމިއްލަ ޖަމިއްޔާ "މެންގްރޯވްސް އެކްޝަން ޕްރޮޖެކްޓު"ގެ ފަރާތުންނެވެ.
ކުރީގެ ސަރުކާރުން ކުޅުދުއްފުށީގެ ކުޅީގެ ބައެއް ހިއްކީ އެއާޕޯޓް އެޅުމަށެވެ. އަދި އެކަން އެގޮތަށް ކުރުމުން ތިމާވެށީގެ ހިމާޔަތުގައި މަސައްކަތްކުރާ ފަރާތްތަކުގެ ފާޑުކިޔުންތައް ވަރަށް ބޮޑަށް އަމާޒުވިއެވެ.
ނަމަވެސް އާ ސަރުކާރުން ވެރިކަމާ ހަވާލުވުމާއެކު އެ ކުޅީގެ ބާކީބައި މިހާރު ވަނީ ހިމާޔަތްކޮށްފައެވެ.