01 Mar 2019, 12:12

ކަޝްމީރުގައި ދިން ހަމަލާއަށް ފަހު އިންޑިއާއާއި ޕާކިސްތާނުގެ މަޝްރަހު ގޯސްވެ، ޕާކިސްތާނުން އަތުލައިގަތް އިންޑިއާގެ ޕައިލެޓް އަބީނަންދަން ވަރުތަމަންއާ މެދު އެގައުމުގެ ސިފައިން ބެހެއްޓި އިންސާނިއްޔަތުކަމަށް އިންޑިއާގެ ރައްޔިތުންގެ ތައުރީޕް ވެސް ޕާކިސްތާނުގެ ސިފައިންނަށް އޮހެން ފަށައިފި އެވެ.

ޕާކިސްތާނުން އިންޑިއާގެ ޕައިލެޓް އަތުުލައިގަތީ އޭނާ ދުއްވަން އިން ފައިޓާ ޖެޓް ވައްޓާލުމަށްފަހު އެވެ.

ޕައިލެޓް އެންމެ ފުރަތަމަ ފެނުނީ ޕާކިސްތާނުގެ ކަޝްމީރުގެ ރައްޔިތުންނަށެވެ. އޭނާ ފެނުމާ އެކު ރައްޔިތުންގެ ބަޔަކު އައިސް އޭނާއަށް ހަމަލާދީ ހެދިއެވެ. ނަމަވެސް ޕާކިސްތާނުގެ ސިފައިން އައިސް ވަނީ އެކަން ހުއްޓުވައިފައެވެ.

ޚުދު ޕައިލެޓް ވެސް ވަނީ، ޕާކިސްތާނުން އާންމުކުރި ވީޑިއޯއެއްގައި، އޭނާގެ ފުރާނަ ސަލާމަތްކޮށްދިނީތީ ޕާކިސްތާނުގެ ސިފައިންނަށް ޝުކުރު އަދާކޮށްފަ އެވެ.

"އަހަންނާ މެދު ކަންތައްތައް ކުރީ ވަރަށް ރަނގަޅަށް. އެނބުރި އިންޑިއާއަށް ދިއުމަށް ފަހު ވެސް ހަމަ ބުނާނީ މިހެން." ޕައިލެޓް ބުންޏެވެ.

އިންޑިއާގެ މަޝްހޫރު ޖާނަލިސްޓް ބަރްކާ ދަތު ވިދާޅުވީ ޕައިލެޓްއާ ދޭތެރޭ ކަންތައްކުރީ ވަރަށް ޕްރޮފެޝަނަލްކޮށް ކަމަށާއި އަދި އޭނާ ސަލާމަތުން ހުރިތަން ފެނުމުން ވަރަށް ބޮޑަށް އުފާވާ ކަމަށެވެ.

އިންޑިއާގެ ޓެލެވިޝަން އެންކަރު މާނަވް ގުޕްތާ ވެސް ވަނީ ޕާކިސްތާނުގެ ސިފައިންނަށް ވަރަށް ބޮޑަށް ތައުރީފްކޮށްފަ އެވެ.

"ޕާކިސްތާނުގެ ސިފައިން މޮބުގެ ކިބައިން ޕައިލެޓް ސަލާމަތްކުރަން ބަޑީގެ ބޭނުން ވެސް ކުރި،" މާނަވް ބުންޏެވެ.

ސުލްހައަށް ތަންދިނުމުގެ ގޮތުން ޕާކިސްތާނުން ވަނީ ޕައިލެޓް މިއަދު ދޫކޮށްލަން ނިންމައިފަ އެވެ.

އިންޑިއާގެ ސުޕްރީމް ކޯޓުގެ ކުރީގެ ފަނޑިޔާރު މާކަންޑޭ ކާޓްޖޫ ވެސް ވަނީ ޕައިލެޓް ދޫކޮށްލަން ނިންމުމަށް ޕާކިސްތާނުގެ ބޮޑުވަޒީރު އިމްރާން ހާން އަށް ވަރަށް ބޮޑަށް ތައުރީފްކޮށްފަ އެވެ.

"އަހަރެން ކުރިން އިމްރާން ހާންއަށް ފާޑު ކިން. ނަމަވެސް މިހާރު އަހަންނަކީ އޭނާގެ ފޭންއެއް." ފަނޑުޔާރު ބުންޏެވެ.

އިންޑިއާގެ މަޝްހޫރު ކްރިކެޓް ކުޅުންތެރިޔާ ހަރްބަޖަން ސިންގް ވެސް ވަނީ ޕައިލެޓް ދޫކޮށްލަން ނިންމުމުމުން އެކަމަށް ތައުރީފްކޮށްފަ އެވެ.