01 Mar 2019, 09:01
އަންނަ މަހު ރާއްޖޭގެ އެންމެ އުތުރުން ފެށިގެން ދެކުނަށް، ޕެރަމޯޓް ޕައިލަޓްގެ ޓީމަކުން "ދޫންޏެއްގެ" ލޮލުން ފެންނަ ފަދައިން ރާއްޖޭގެ ރަށްތަކުގެ ރީތިކަން މުޅި ދުނިޔެއަށް ދައްކާލުމަށް ތައްޔާރުވެއްޖެ އެވެ.
އެސޯސިއޭޝަން އޮފް ސްކައި ސްޕޯޓްސް މޯލްޑިވްސް، އެމްފިބަޒް، ބްލޫޕީސް އަދި ރޯވިންގް އެސޯސިއޭޝަން އޮފް މޯލްޑިވްސް ގުޅިގެން ބޭއްވުމަށް ހަމަޖެހިފައިވާ މި ހަރަކާތަކީ ޕެރަމޮޓޯ މޯލްޑިވްސް 2019ގެ ނަމުގައި ރާއްޖޭގެ ފަތުރުވެރިކަން ދުނިޔޭގައި އިސްތިހާރު ކުރުމުގެ ގޮތުންނާއި ވައިގެ ކުޅިވަރުތަކަށް ދިވެހީން ޝައުގުވެރި ކުރުމަށް ބާއްވާ ހަރަކާތެކެވެ.
ސްކައި ގާއިޒްގެ އިންތިޒާމުގެ ދަށުން މިހަރަކާތް ފެށުމަށް ހަމަޖެހިފައި ވަނީ ރާއްޖޭގެ އެންމެ އުތުރުގައިވާ ހއ. ތުރާކުނުން މާޗު އެއްވަނަ ދުވަހު އެވެ. ދެ ހަފްތާގެ މުއްދަތަކަށް ކުރިއަށް ގެންދާ މިހަރާކާތް ނިންމާލާނީ ރާއްޖޭގެ އެންމެ ދެކުނުގައިވާ އައްޑޫ ސިޓީގެ ގަމުން ކަމަށްވާ އިރު މި ދަތުރުގެ ތެރޭގައި މުޅި ރާއްޖޭގެ ހުރިހާ ރަށެއް ކަހަލަ ގޮތަކަށް މަތިން ފެނިގެންދާނެ އެވެ.
މި ބޮޑު ހަރަކާތަކީ ހަމައެކަނި މަތީގައި އުދުހިގެން ކުރިއަށް ދާނެ ހަރަކާތެެއް ނޫނެވެ. އެގޮތުން ސްކައިޑައިވިންގް އާއި ޕެރެގްލައިޑިންގް ފަދަ ރާއްޖެއަށް މުޅިން އައު ކުޅިވަރުތަކުގެ އިތުރުން ރާއްޖޭގެ އާދަކާދަ ބޭރު ދުނިޔެއަށް ދައްކުވައި ދިނުމުގެ ގޮތުން ރާއްޖޭގެ ބައެއް ސަގާފީ ހަރަކާތްތައް ވެސް މި ކަމުގެ ތެރޭގައި ކުރިއަށް ގެންދިއުމަށް ވަނީ އިންތިޒާމުކޮށްފަ އެވެ.
ޖުމްލަ 12 ޕެރަމޮޓޯ ޕައިލެޓުންގެ ޓީމަކާ އެކު ފަށާ މިދަތުރުގައި ރާއްޖޭގެ 24 ރަށަކަށް މަޑު ކުރާއިރު މީހުން ދިރިއުޅޭ ރަށްރަށުގެ މަތިން ދަތުރު ކުރާނީ ގާތްގަނޑަކަށް 50 މީޓަރު މަތިންނެވެ. އެއީ އެ ހަރަކާތުގެ ފޮޓޯ ނަގާއި ހަރަކާތް ރީއްޗަށް ރަށް ރަށުގެ ރައްޔިތުންނަށް ދައްކާލުމަށް ޓަކައެވެ.
މި ހަރަކާތް ކަވާ ކުުރުމަށް ޓަކައި ރާއްޖޭގެ މީޑިއާތަކަށް ފުރުސަތު ހުޅުވާލާފައިވާ އިރު ބޭރުގެ ބޮޑެތި ނޫސްތަކުން ވެސް މިހަރަކާތް ކަވާ ކުރުމަށް ޝައުގުވެރިކަން ފާޅު ކުރަމުންދާ ކަމަށް ހަރަކާތް ހިންގާ ފަރާތް ކަމަށް ވާ ސްކައި ބޯއީޒް އިން ބުނެއެވެ.
މީގެ އިތުރުން މި ހަރަކާތުގެ ސަބަބުން ރާއްޖޭގައި ތަޣައްޔަރު ވަމުންދާ މޫދާއި ކުޅިތަކުގެ އިތުރުން މޫސުމަށް އަންނަ ބަދަލުތަކުގެ ސަބަބުން ރާއްޖެއަށް ލިބިދާނެ ގެއްލުންތަކަށް ގިނަ ބަޔަކު ހޭލުންތެރި ވުމުގެ އިތުރުން ބޭރު ދުނިޔެއަށް ރާއްޖޭގެ ހިތްގައިމުކަން ފެނިގެންދާނެ ކަމަށް ސްކައި ބޯއިޒް އިން ބުނެ އެވެ.