25 Feb 2019, 21:50
އެމްޑީޕީގެ ޕްރައިމަރީގައި ވާދަކޮށްގެން ބަލިވި ކެންޑިޑޭޓުން ރައްޔިތުންގެ މަޖިލީހުގެ އިންތިހާބުގައި ވާދަ ނުކުރާނެ ކަމަށް އުންމީދު ކުރައްވާ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ސިޔާސީ ޕާޓީތަކުގެ ޕްރައިމަރީގައި ވާދަކޮށް، ނާކާމިޔާބުވާ ފަރާތްތަކަށް ރައްޔިތުންގެ މަޖިލީހުގެ އިންތިހާބުގައި ވާދަކުރެވޭނެކަމަށް ސުޕްރީމް ކޯޓުން މިއަދު ވަނީ ކަނޑައަޅައިފަ އެވެ. މަޖިލިސް އިންތިހާބަށް ވާދަ ކުރުމުގެ މުއްދަތު ހަމަވެފައިވީ ނަމަވެސް އަންނަ މަހުގެ ހަތަރު ވަނަ ދުވަހާ ހަމައަށް ޕްރައިމަރީން ބަލިވި ކެންޑިޑޭޓުންނަށް ފުރުސަތު ހުޅުވާލުމަށް މިއަދު އެ ކޯޓުން ވަނީ އަމުރުކޮށްފަ އެވެ.
އެކަމާ ގުޅިގެން މިރޭ ނަޝީދު ކުރެއްވި ޓްވީޓެއްގައި ވިދާޅުވީ، ޕްރައިމަރީގައި ނާކާމިޔާބުވި އެމްޑީޕީގެ ކެންޑިޑޭޓުން އެ ޕާޓީގެ އުސޫލާ ހިލާފަށް އަލުން އިންތިހާބުގައި ވާދަ ނުކުރައްވާނެ ކަމަށް އުންމީދު ކުރައްވާ ކަމަށެވެ. އަދި ޕާޓީގެ ހުރިހާ މެމްބަރުންވެސް ޕާޓީ އާއި ރާއްޖޭގެ ސިޔާސީ މަސްލަހަތަށް ބަލާނެ ކަމަށް އުންމީދު ކުރައްވާ ކަމަށް އެމަނިކުފާނު ވިދާޅުވި އެވެ.
މިއަދު ސުޕްރީމް ކޯޓުގެ އަމުރަށް ފާޑުވިދާޅުވަމުން ނަޝީދު ވިދާޅުވީ، މަޖިލިސް އިންތިހާބަށް ކުރިމަތިލުމުގެ މުއްދަތު އިތުރު ކުރުމަކީ ސުޕްރީމް ކޯޓަށް ކުރެވޭނެ ކަމެއް ނޫން ކަމަށެވެ. އަދި ރާއްޖޭގެ ކޯޓުތަކުގެ އަގު ވެއްޓި އިތުބާރު ގެއްލިގެންދާ އެންމެ ބޮޑު ސަބަބަކީ ކޯޓުތަކުން އިންތިހާބުތަކަށް ނުފޫޒު ފޯރުވުން ކަމަށް އޭނާ ވިދާޅުވިއެވެ.
ޕްރައިމެރީގައި ވާދަކުރުމުން ބަލިވާ ފަރާތްތަކުން އިންތިހާބުގައި ވާދަ ނުކުރެވޭ ގޮތަށް ސިޔާސީ ޕާޓީތަކުގެ ގާނޫނަށް ގެނައި އިސްލާހު ބާތިލް ކުރުމަށް ސުޕްރީމް ކޯޓަށް މައްސަލަ ހުށަހެޅުއްވީ، އެމްޑީޕީން ބޭއްވި މަޖިލިސް ޕްރައިމަރީގައި ކާށިދޫ ދާއިރާއިން ނާކާމިޔާބުވެވަޑައިގެންނެވި އަބްދުﷲ ޖާބިރު އާއި ހިތަދޫ އުތުރު ދާއިރާގެ ޕްރައިމަރީން ބަލިވި އަހްމަދު މުހައްމަދުގެ އިތުރުން ގާނޫނީ ވަކީލު އަބްދުލް މާނިއު ހުސައިން އެވެ.
ސުޕްރީމް ކޯޓުގެ ފުލް ބެންޗުން ބެއްލެވި އެ މައްސަލައިގެ ރިޔާސަތުގައި އިންނެވީ އުއްތަމަ ފަނޑިޔާރު ޑރ. އަހްމަދު އަބްދުﷲ ދީދީ އެވެ.
މިއަދު އިއްވި ހުކުމުގައި ބުނެފައިވަނީ ސިޔާސީ ޕާޓީތަކުގެ ގާނޫނުގެ 10 ވަނަ މާއްދާ އަކީ ގާނޫނު އަސާސީއާ ތައާރުޒުވާ މާއްދާއެއް ކަމަށެވެ. އެހެން ކަމަށް ވުމުން އެ މައްދާ ބާތިލްކޮށް މަޖިލިސް އިންތިހާބަށް ކުރިމަތިލުމުގެ ފުރުސަތު ބަންދުވެފައިވީ ނަމަވެސް، ޕްރައިމަރީތަކުން ބަލިވި މީހުންގެ ތެރެއިން އިންތިހާބުގައި ވާދަކުރަން ބޭނުންވާ މީހުން އިންތިހާބަށް ކުރިމަތިލުމުގެ ފުރުސަތު މާޗު ހަތަރަކާ ހަމައަށް ހުޅުވާލާ ކަމަށް ހުކުމުގައިވެ އެވެ. އަދި އެ މުއްދަތުގައި ވާދަކުރުމަށް ހުށަހެޅޭނީ ހަމަ އެކަނި، ޕާޓީއެއްގެ އެތެރޭގެ ޕްރައިމަރީއެއްގައި ވާދަކޮށްފައިވާ ފަރާތަކަށް އެކަނި ކަމަށް ވެސް ހުކުމުގައި ބުނެފައިވެ އެވެ.
ޕްރައިމެރީގައި ވާދަކުރުމުން ބަލިވާ ފަރާތްތަކުން އިންތިހާބުގައި ވާދަ ނުކުރެވޭ ގޮތަށް ކަނޑައެޅީ 2016 ވަނަ އަހަރު އެވެ. ވިލިނގިލި ދާއިރާގެ އޭރުގެ ޕީޕީއެމް މެމްބަރު ސައުދު ހުސެއިން މަޖިލީހަށް ހުށަހަޅައި ފާސްކުރި އިސްލާހުގައި ވަނީ، ސިޔާސީ ޕާޓީއެއްގައި ރަޖިސްޓަރީ ކޮށްފައިވާ މެމްބަރަކު، ގާނޫނު އަސާސީން ނުވަތަ ގާނޫނަކުން ބާރު ލިބިގެން ބާއްވާ އެއްވެސް އިންތިހާބެއްގައި ސިޔާސީ ޕާޓީއެއްގެ ޓިކެޓް ހޯދަން އެ ޕާޓީގެ ޕްރައިމަރީގައި ވާދަކޮށް، ބަލިވުމަށް ފަހު، އެ އިންތިހާބެއްގައި އެހެން އެއްވެސް ހައިސިއްޔަތަކުން ބައިވެރި ނުވެވޭނެ ކަމަށެވެ. އަދި އެފަދަ މީހަކު ކެންޑިޑެސީ ހޯދަން އިލެކްޝަންސް ކޮމިޝަނަށް ހުށަހަޅައިފި ނަމަ، އެ މެމްބަރެއްގެ ކެންޑިޑެސީ އެ ކޮމިޝަނުން ބާތިލު ކުރަން ވާނެ ކަމަށް ވެސް އިސްލާހުގައިވެ އެވެ.