20 Feb 2019, 16:29
އަރަބިއްޔާ ސްކޫލަށް 22 ޓީޗަރުން، މިސްރުގެ އަލް އަޒްހަރު ޔުނިވާސިޓީ އިން ހަމަޖައްސައިދީފި އެވެ.
އަރަބިއްޔާ ސްކޫލަށް ޓީޗަރުން ހަމަނުވާ މައްސަލަ ހައްލުކުރުމަށް ސަރުކާރުގެ ވަފުދެއް ދާދި ފަހުން ވަނީ މިސްރަށް ވެސް ވަޑައިގެންފަ އެވެ.
އެ ދަތުރަށް ފަހު މީޑިއާއަށް މައުލޫމާތު ދެއްވަމުން ރައީސް އޮފީގެ ޗީޕް އޮފް ސްޓާފް އަލީ ޒާހިރު ވިދާޅުވީ އަރަބިއްޔާ ސްކޫލަށް ފޮނުވާނެ 22 ޓީޗަރުން ފޮނުވުމުގެ ހުރިހާ ކަމެއް މިހާރު ހަމަޖެހިފައިވާ ކަމަށެވެ.
"އަޅުގަނޑުމެންނަށް ކުރިއަށް އޮތް ހަފްތާގައި ޑޭޓެން ލިބިގެންދާނެ އަޅުގަނޑުމެން އުއްމީދުކުރަނީ ފެށޭ ހަފްތާގައި އެކަން ހަމަޖެހިގެން ދާނެ ކަމަށް،" އެ ޓީޗަރުން ރާއްޖެއަށް ވަޑައިގަންނަވާނެ ތާރީހާ ބެހޭ ގޮތުން އަލީ ޒާހިރު ވިދާޅުވި އެވެ.
ދިރާސީ އަހަރު ފެށިގެން މިހާތަނަށް ވެސް އަރަބިއްޔާ ސްކޫލުގެ ޓީޗަރުން ހަމަނުވާތީ ބެލެނިވެރިން ވަނީ ކަންބޮޑުވުން ފާޅުކޮށްފަ އެވެ.
ސްކޫލަށް ޓީޗަރުން ހަަމަނުވާތީވެ އަރަބިއްޔާގައި މިހާރު ކިޔަވައިދެމުންގެން ދަނީ އެހެން ސްކޫލުތަކުގެ ޓީޗަރުން ގެނެސްގެންނެވެ.
އަރަބިއްޔާގެ ދަރިވަރުން މި އަހަރު ފަހުކޮޅު ޝަހާދާ ސާނަވިއްޔާ އިމްތިހާންގައި ބައިވެރިވާން ޖެހޭތީ އެ ކުދިންގެ ކިޔެވުން އެންމެ ދުވަހެއް ވެސް ގެއްލުމަކީ ބެެލެނިވެރިން ވަރަށް ކަންބޮޑުވާ ކަމެކެވެ.
"އެ ދަރިވަރުން އެބަ ކިޔަވާ 17، 18 މާއްދާ. ޓީޗަރުން ލަސްވާ ކޮންމެ ދުވަހަކާ ހުރެ އެތަކެއް ފިލާވަޅުތަކެއް ގެއްލިގެން ދަނީ،" އެ ސްކޫލުގެ ބެލެނިވެރިޔެއް ބުންޏެވެ.