17 Feb 2019, 12:29
ހއ. އިހަވަންދޫ ސްކޫލްގެ އިސްވެރިންނާ ނާއިބު ރައީސް ފައިސަލް ނަސީމް ބައްދަލުކުރައްވައިފިއެވެ.
ރައީސް އޮފީހުގައި މިއަދު ބޭއްވި އެ ބައްދަލުވުމުގައި ، އިހަވަންދޫ ސްކޫލްގެ 50 އަހަރުގެ ތާރީހުގައި ހޯދާފައިވާ ކާމިޔާބީތަކާއި، ސްކޫލްގެ ތަރައްޤީގައި ރަށުގެ ރައްޔިތުން ވެފައިވާ ހިއްސާ ސްކޫލުގެ އިސްވެރިން ވަނީ ފާހަގަކުރައްވައިފައެވެ.
އަދި ރާއްޖޭގައި ނަންވިދާލާ ސްކޫލަކަށް އިހަވަންދޫ ސްކޫލް ހެދުމަކީ ރައްޔިތުންގެ ވަރަށް ބޮޑު އެދުމެއްކަން ފާހަގަކުރައްވައި، ކުރިއަށް އޮތްތާނގައި ސްކޫލް އިތުރަށް ތަރައްގީކުރުމަށް ޓަކައި ފުރިހަމަކުރަން ބޭނުންވެފައިވާ ކަންކަމާ ބެހޭ މައުލޫމާތު ރައީސުލްޖުމްހޫރިއްޔާގެ ނާއިބާ އެ ފަރާތުން ވަނީ ހިއްސާކޮށްފައެވެ.
ހާއްސަކޮށް މިއަހަރަކީ އިހަވަންދޫ ސްކޫލްގެ 50 ވަނަ އަހަރީ ދުވަސް ފާހަގަކުރާ އަހަރަށް ވުމާއެކު އެކަމުގެ އިހުތިފާލުތައް ކުލަގަދަކޮށް ކުރިއަށް ގެންދިއުމަށް ޓަކައި ސްކޫލްގެ ބެލެނިވެރިންނާއި މުވައްޒަފުން ގުޅިގެން ގިނަ ހަރަކާތްތަކެއް ރާވަމުންދާ ކަން ވެސް އިހަވަންދޫ ސްކޫލްގެ ފަރާތުން ވަނީ ފާހަގަކޮށްފައެވެ.
އެ ބައްދަލުކުރެއްވުމުގައި ނައިބު ރައީސް ފައިސަލް ވިދާޅުވީ، ތައުލީމީ ދާއިރާ ކުރިއަރުވައި ތައުލީމީ ޖީލެއް ބިނާ ކުރުމަށް ސަރުކާރުން ވަރަށް ބޮޑު އަހަންމިއްޔަތުކަމެއް ދޭ ކަމަށެވެ.
އެގޮތުން، މިއަހަރުގެ ބަޖެޓުގައި އެއް ދާއިރާއަކަށް އެންމެ ބޮޑު މިންވަރެއް ހަމަޖެހިފައިވަނީ ތައުލީމީ ދާއިރާއަށް ކަން ވެސް ފާހަގަ ކުރައްވައި އިހަވަންދޫ ސްކޫލަށް ބޭނުންވެފައިހުރި ކަންކަމުގައި އެޑިޔުކޭޝަން މިނިސްޓްރީއާ ގުޅިގެން ކުރިއަށް ދިއުމަށް ވަނީ އެދިވަޑައިގެންފައެވެ.