10 Feb 2019, 10:51
ކޮރަޕްޝަން ހުއްޓުވުމާއި ހެޔޮވެރިކަން ކުރުމުގެ މަސައްކަތު ބައްދަލުވުމެއް ރައީސް އޮފީހުން ސަރުކާރުގެ މުއަސަސާތަކަށް ފަށައިފި އެވެ.
ދެ ދުވަހުގެ މި މަސައްކަތު ބައްދަލުވުމަކީ ރައީސް އިބްރާޙިމް މުހައްމަދު ސޯލިހްގެ ރިޔާސީ ވައުދެކެވެ.
މިއަދު ހެނދުނު އާޓް ގެލެރީގައި މި މަސައްކަތު ބައްދަލުވުން ފައްޓަވައި ދެއްވީ ރައީސް އޮފީހުގެ މިނިސްޓަރު އަލީ ޒާހިރެވެ.
މަސައްކަތު ބައްދަލުވުން ފައްޓަވައި ދެއްވަމުން އަލީ ޒާހިރު ވިދާޅުވީ، ދައުލަތުގެ އެންމެހާ މުއަސަސާތަކުން ކޮރަޕްޝަންގެ ނުބައި އަމަލުތަކުން ސަލާމަތްކޮށް އެ މުއަސަސާތަކީ ނަޒާހަތްތެރި، އަދި ރައްޔިތުންގެ އިތުބާރު ލިބިގެންވާ މުއަސަސާތަކަށް ހެދުމަކީ ސަރުކާރުގެ އަމާޒެއް ކަމަށާއި، އެ އަމާޒު މި ސަރުކާރުން ހާސިލް ކުރެވޭނެ ކަމަށެވެ.
"ދައުލަތުގެ މުއަސަސާތަކަކީ، ހާމަކަންބޮޑު ދެފުށް ފެންނަ، ދުރާލައި ހަމަޖެހިފައި އޮންނަ އުސޫލުތަކެއްގެ މަތިން ހިންގާ ތަންތަން ކަމުގައި ވާން ޖެހޭ،" އަލީ ޒާހިރު ވިދާޅުވިއެވެ.
ރައީސް އޮފީހުގެ މިނިސްޓަރު އަލީ ޒާހިރު ވާހަކަ ދައްކަވަނީ -- ސަން ފޮޓޯ
ކޮރަޕްޝަން ހުއްޓުވުމަށް އެންމެ ބޮޑު އިސްކަމެއްދޭން ޖެހޭ ކަމަކީ އެކަން ކަމަށް ރައްކާތެރިކަމުގެ ފިޔަވަޅު އެޅުން ކަމަށް އަލީ ޒާހިރު ވިދާޅުވިއެވެ.
ސަރުކާރުގެ މިނިސްޓްރީތަކާއި މިނިވަން މުއަސަސާތަކުން ބައިވެރިވާ މި ބައްދަލުވުމުގައި ވާހަކަ ދައްކަވަމުން އަލީ ޒާހިރު ވިދާޅުވީ، ސަރުކާރުގެ މުއަސަސާތަކަކީ ވަކި ބަޔަކަށް މަންފާ ހޯދޭނެ ގޮތަށް ބައްޓަން ވެފައިވާ ތަންތަން ކަމުގައި ވެގެން ނުވާނެ ކަމަށެވެ.
މަސައްކަތު ބައްދަލުވުމުގައި މައުލޫމަތު ދެމުން ދަނީ އެކަމާ ގުޅުން ހުރި އިދާރާތަކާއި ޖަމިއްޔާތަކުންނެވެ. އެގޮތުން އޮޑިޓާ ޖެނެރަލް އޮފީސް، އެންޓިކޮރަޕްޝަން ކޮމިޝަން އާއި ޓްރާންސްޕޭރަންސީ މޯލްޑިވްސް އަދި އިންޓަނޭޝަނަލް ރިޕަބްލިކް އިންސްޓިޓުޓް އިން ދަނީ މި މަސައްކަތު ބައްދަލުވުމުގައި ސެޝަންތައް ނަގައިދެމުންނެވެ.