07 Feb 2019, 15:13
ހައުސިން ލޯނުތަކުގެ އިންޓްރެސްޓު ހަ ޕަސެންޓަށް ކުޑަކުރަން ނިންމާފައިވާ ކަމަށް ޕްލޭނިން އެންޑް އިންފްރާސްޓްރަކްޗާ މިނިސްޓަރު މުހައްމަދު އަސްލަމް ވިދާޅުވެއްޖެ އެވެ.
ރައީސް އިިބްރާހިމް މުހައްމަދު ސޯލިހުގެ ފުރަތަމަ ރިޔާސީ ބަޔާނުގައި ފާހަގަކުރެއްވި ކަންތައްތަކާ ގުޅޭ ގޮތުން ރާއްޖެ ޓީވީގެ ޕްރޮގްރާމެއްގައި ވާހަކަ ދައްކަވަމުން މިނިސްޓަރު ވިދާޅުވީ ގެދޮރު ހޯދަން ނަގާ ލޯނުގެ ސަބަބުން އާންމު ރައްޔިތުމީހާ އަށް ބުރައަކަށް ނުވާނެހެން ކަންތައް އިންތިޒާމު ކުރަން ޖެހޭ ކަމަށެވެ. ހައުސިން ލޯނު މިހާރު ލިބެނީ 12 ޕަސެންޓުގައި ކަމަށާއި އެ އަދަދު ހަ ޕަސެންޓަށް ދަށް ކުރާނެ ކަމަށް މިނިސްޓަރު ވިދާޅުވި އެވެ.
"މިހާރު ލޯނު އަނބުރާ ދައްކަން އެބަ ހަރަދު ކުރަން ޖެހޭ 32000 ރުފިޔާ. މިއީ އެވްރެޖު އާމްދަނީ އެއް ލިބޭ މީހަކަށް ވަރަށް ބޮޑު އަދަދެއް. އިންޓްރެސްޓު ރޭޓް ކުޑަ ކުރަން އެބަ ޖެހޭ،" މިނިސްޓަރު އަސްލަމް ވިދާޅުވީ ހައުސިން ލޯނާއި ބިލްޑިން ލޯނުގެ ތަފާތު ކަމަށެވެ. ކޮމާޝަނލް ބޭނުމަށް ގެދޮރު އަޅާމީހުންނަށް ދޫކުރަން ޖެހޭނީ ބިލްޑިން ލޯނު ކަމަށް މިނިސްޓަރު ވިދާޅުވި އެވެ.
ޕްލޭނިން މިނިސްޓަރު އިތުރަށް ވިދާޅުވީ ކުރިއަށް އޮތް ފަސް އަހަރު ތެރޭ ބޯހިޔާވަހިކަމުގެ މައްސަލަ މި ސަރުކާރުން ހައްލު ކުރާނެ ކަމަށެވެ. އެންމެ ނުލިބޭ މީހާ އިން ފެށިގެން އެންމެ މުއްސަނދި މީހާއަށް ހާއްސަ ބޯހިޔާވަހިކަމުގެ ސުކީމްތަކުގެ ދަށުން އެމީހަކާ އެކަށީގެންވާ ފެންވަރުގެ ފްލެޓު ދޭނެ ކަމަށް މިނިސްޓަރު ވިދާޅުވި އެވެ.
ބޯހިޔާވަހިކަމުގެ މަޝްރޫއުތައް ކުރިއަށް ގެންދިއުމަށް ނޭޝަނަލް ހައުސިން ކޯޕަރޭޝަންގެ ނަމުގައި ކުންފުންޏެއް އުފައްދަން ނިންމަވައި ރައީސް މިއަދު އެކަން އިއުލާނު ކުރެއްވި އެވެ.
މީގެ އިތުރުން މާލޭގައި އިތުރު އިމާރާތެއް ނާޅާނެ ކަމަށް ރައީސް ސޯލިހު ވިދާޅުވި ވިދާޅުވުމަށް އިޝާރާތް ކުރައްވައި އަސްލަމް ވިދާޅުވީ މި އަހަރު ތެރޭ ސަރުކާރުގެ ހަތަރު މިނިސްޓްރީއެއް ހުޅުމާލެ އަށް ބަދަލު ކުރާނެ ކަމަށެވެ.
ޕްލޭނިން މިނިސްޓްރީގެ އިމާރާތެއް ހުޅުމާލޭގައި އަޅައިދޭނެ ބަޔަކު ހޯދަން މިހާރު ވަނީ އިއުލާނުކޮށްފަ އެވެ.