31 Jan 2019, 16:17
ހުޅުމާލޭ އިރުމަތީ ފަރާތުގައި އޮންނަ ބީޗުގައި ވިޔަފާރި ކުރާ ފަރާތްތަކުން މިއަދުގެ ނިޔަލަށް އެ ތަން ހުސްނުކޮށްފިނަމަ ފިޔަވަޅު އަޅާނެ ކަމަށް ހައުސިން ޑިވެލޮޕްމެންޓް ކޯޕަރޭޝަން އެޗްޑީސީ އިން ބުނެފިއެވެ.
އެޗްޑީސީ އިން ބުނީ ހުޅުމާލެ ބީޗުގައި މޭޒު ޖަހައިގެން ރެސްޓޯރެންޓު، ހޮޓާ ހިންގަމުންދިޔަ ފަރާތްތަކުން މިހާރު އެތަން ހުސްކުރަމުންދާ ކަމަށެވެ.
"ފުރުސަތު ދީފައިވާނީ މިއަދުގެ ނިޔަލަށް ތަން ހުސްކުރަން. މިއަދުގެ ނިޔަލަށް ބަލާފަ، ތަން ހުސްނުކުރާ މީހުންނާމެދު އިއުލާނުގައިވާގޮތަށް ފިޔަވަޅު އަޅާނަން،" އެކުންފުނީގ އޮފިޝަލަކު ވިދާޅުވިއެވެ.
އެޗްޑީސީ އިން ބުނީ ބީޗުގައި ޖަހާފައިވާ ގޮނޑި މޭޒުތައް ގިނަ ބަޔަކު މިއަދު ނަގަމުންދާ ކަމަށެވެ. ހުޅުމާލެ ބީޗު ވިޔަފާރި ބޭނުމަށް ބޭނުންކުރަމުންދާ މައްސަލައަކީ ގިނަ ދުވަސްވީ މައްސަލައެކެވެ. މިދިޔަ މަހު އެޗްޑީސީ އިން ބުނީ ހުޅުމާލޭ އިރުމަތީ ފަރާތުގައި އޮންނަ ބީޗާއި ހޭޅިފަށަކީ އާންމު ސަރަހައްދެއް ކަމަށެވެ. އަދި އެ ސަރައްދުގައި ވިޔަފާރި ކުރުމުގެ ހުއްދަ އެއްވެސް ފަރާތަކަށް ދީފައި ނުވާނޭ ކަމަށެވެ.
އެޗްޑީސީ އިން އޭރު ބުނެފައިވަނީ މިއަދުގެ ނިޔަލަށް ބީޗު ހުސްކުރަން ޖެހޭނެ ކަމަށާއި ސްނުކޮށްފި ނަމަ އެޗްޑީސީން ހުސް ކުރާނެ ކަމަށާއި، ގަވާއިދާ ހިލާފަށް މަސައްކަތް ކުރިއަށް ގެންދާ ނަމަ ފިޔަވަޅު ވެސް އަޅާނެ ކަމަށެވެ.
ހުޅުމާލޭގެ އާންމު ސަރަހައްދުތައް ބޭނުންކުރުމާ ގުޅޭ އުސޫލެއް އެކުލަވާލަން ވެސް ނިންމާފައިވާ ކަމަށް އެޗްޑީސީން ބުންޏެވެ.