09 Jan 2019, 16:27
މި އަހަރު ސްކޫލުތައް ހުޅުވެން ވާއިރަށް ގިނަ ޓެކްސް ފޮތްތަކެއް ލިބޭނެ ކަމަށް ސްކޫލުތަކުން ބުނެފި އެވެ.
އާ އަހަރުގެ ކިޔެވުން ފެށެނީ އަންނަ އާދިއްތަ ދުވަހު އެވެ. އަދި ސްކޫލު ހުޅުވެންވާއިރަށް ދަރިވަރުންގެ ފޮތްތައް ނުލިބޭ ކަމުގެ ޝަކުވާ ލިބެމުންދާ ކަމަށެވެ.
އަހުމަދިއްޔާ އިންޓަނޭޝަނަލް ސްކޫލުގެ ޕްރިންސިޕަލް މުހައްމަދު ރަޝީދު ވިދާޅުވީ ބައެއް ގްރޭޑްތަކުގައި ފޮތްތައް ލިބުން ދަތިވެފައިވާ ކަމަށާއި އެހެންނަމަވެސް ސްކޫލު ފެށޭ އިރު ގިނަ ޓެކްސް ފޮތްތައް ލިބޭނެ ކަމަށް ވަރަށް ބޮޑަށް ބެލެވޭ ކަމަށެވެ.
މާލޭގެ އެހެނިހެން ސުކޫލުގެ ޕްރިންސިޕަލެއް ބުނީ އެ ސްކޫލުގެ ގްރޭޑް ދޭކުން ހަޔަކަށް މިހާރު ފޮތްތައް ދޫކޮށް ނިމިފައިވާ ކަމަށެވެ. އަދި މާދަމާ ގްރޭޑް އެކަކަށް ފޮތްތައް ދޫކުރުމަށް ހަމަޖެހިފަިއވާ ކަމަށެވެ. އޭނާ ވިދާޅުވީ ފޮތްތައް ލިބުގައި ލަސްތަކެއް އުޅެނީ ފޮތްތައް އަލުން ޕްރިންޓުކުރަން ނިންމުމުން ކަމަށެވެ.
ކުރީގެ ސަރުކާރުން ކުރިން ނިންމައިފައި އޮތީ ހުރިހާ ސްކޫލަކުން ވެސް ޓެކްސްޓްފޮތުގެ ބަދަލުގައި ޓެބްލެޓް ބޭނުންކުރާ ގޮތަށެވެ. އެކަމަށް ޓަކައި ވަރަށް ގިނަ ސްކޫލުތަކަށް ޓެބްލެޓްތައް ބަހައި އެއަށް އަހުލުވެރިކުރުމުގެ ގޮތުން އޮރިއެންޓޭޝަން ޕްރޮގްރާމްތައް ވެސް ކުރިއަށް ގެންދިޔަ އެވެ.