09 Jan 2019, 10:29
ދިވެހިރާއްޖޭގައި ޗާޕު ކުރުމުގެ ހިދުމަތް އެންމެ ފުޅާ ދާއިރާއެއްގައި ދެމުން ގެންދާ ނޮވެލްޓީގެ ވެރިޔާ މ. ވާރޭވިލާ އަލްފާޟިލް ޢަލީ ޙުސައިން އަވަހާރަވެއްޖެއެވެ.
ސަންއަށް އެނގިފައިވާ ގޮތުގައި، ޢަލީ ހުސައިން އަވަހާރަވެފައި ވަނީ، އާލާސްކަންފުޅަކާ އުޅުއްވުމަށްފަހުގައެއް ނޫނެވެ. އެގޮތުން، ރޭގައިވެސް އޮފީހުގެ މަސައްކަތުގައި ވަރަށް ހަރަކާތްތެރިވެ އުޅުއްވިކަމަށް ނޮވެލްޓީގެ މުވައްޒަފުންގެ ފަރާތުން އެނގިފައިވެއެވެ.
ޢަލީ ޙުސައިން އަވަހާރަވީ މިއަދު ހެނދުނު އަށަކާއި ނުވައަކާ ދެމެދުގެ ވަގުތެއްގައެވެ. މިއަދު ހެނދުނު ކޮންމެވެސް ވަރެއްގެ އުނދަގުލެއް އިހްސާސްކުރެވޭކަމަށް ވިދާޅުވުން ފިޔަވައި އެހެން ބައްޔެއް އޭގެ ކުރީން ފާހަގަކުރެވިފައި ނުވާކަމަށް މައުލޫމާތު ލިބިފައިވެއެވެ.
އަލްފާޟިލް ޢަލީ ޙުސައިން ގައުމަށް ހިދުމަތް ކުރައްވަން ފެށްޓެވީ ސުމުއްވުލްއަމީރު އިބްރާހިމް ނާސިރުގެ އޮފީހުގައެވެ. މީގެ ބައިގަރުނު ކުރީން ޗާޕުގެ މަސައްކަތުގެ ތެރެއަށް ވެންނެވި ޢަލީ ޙުސައިންއަކީ ދިވެހި ފޮތް އަލަމާރި މުއްސަނދި ކުރުމަށް އެންމެ ބޮޑަށް މަސައްކަތް ކުރެއްވި ފަރާތެވެ. މި ގޮތުން މާ ގިނައިން ނުވިކޭ ކަހަލަ ދުވަސްވީ ފޮތްތައް ވެސް އަލުން ޗާޕު ކުރައްވައި އެ ފޮތްތައް ލިބޭނޭ މަގު ފަހިކޮށްދެއްވިއެވެ.
"ދިވެހި އަދީބުންގެ ދުވަސްވީ ލިޔުންތަކުގެ" ނަމުގައި، ކުރީގެ ލިޔުންތެރީންގެ ލިޔުންތަކުގެ ތެރެއިން ފާހަގަ ކުރެވޭ ލިޔުންތައް ހިމަނުއްވައިގެން ސިލްސިލާއެއް ނެރުއްވިއެވެ. "ރީތިޅެން"ގެ ނަމުގައި ކުރީގެ ޅެންވެރީންގެ ޅެންތަކުގެ ވެސް މިފަދަ ސިލްސިލާއެއް ނެރުއްވިއެވެ.
"ދުށްތަނާއި އިވުނު އަޑުގެ ހަނދާން ހުރި ބައި" އާއި "ދިވެހި ޑައިޖެސްޓް" އަކީ ޢަލީ ޙުސައިންގެ އަމިއްލަފުޅު އިބާރާތްތައް ކިޔާލަން ބޭނުން ފަރާތްތަކަށް ދޫކުރައްވައިފައިވާ އަގުބޮޑު ހަޒާނާއެކެވެ.
މަޝްހޫރު ލިޔުންތެރިޔާ އަލްފާޟިލް ޢަބްދުﷲ ނަޢީމް އިބްރާހީމް ވިދާޅުވަނީ އަލްފާޟިލް "ޢަލީ ޙުސައިންއަކީ ކޮންމެ ލިޔުންތެރިއަކު ވެސް އޭނާގެ ކިބައިން ނަމޫނާ ލިބިގަންނަން ޖެހޭ ބޭފުޅެއް. މިސާލަކަށް ކަންކަން ހަނދާން ހުއްޓައި ނޯޓު ކުރެއްވުން. ދިވެހި ބަހުން ހުންނަ ލިޔުންތައް ވިދާޅުވުން. ޢަލީ ޙުސައިން ފޮތް ވިދާޅު ނުވެ އެއްވެސް ދުވަހެއް ނުދާނެ. ދިވެހި ބަހުން ލިޔެވި އާއްމު ކުރެވިފައިވާ އެއްވެސް ފޮތެއް ނޯންނާނެ ޢަލީ ޙުސައިން ވިދާޅު ނުވާ. ދެން، ލިޔުއްވާއިރު ހިތުގައި އޮންނަ ގޮތަށް ލިޔުއްވުން. ގިނަ ލިޔުންތެރީން ލިޔަނީ އަތުން. އެކަމަކު ޢަލީ ޙުސައިން ލިޔުއްވަނީ ހިތްޕުޅުން. މިކަން ޢަލީ ޙުސައިންގެ ލިޔުއްވުންތަކުން ވަރަށް ރީއްޗަށް ފެންނާނެ. ޢަލީ ޙުސައިންގެ ލިޔުންތަކުން ފެންނާނީ މައް ދިވެހި ބަސް." ކަމަށެވެ.