08 Jan 2019, 09:40
މާލޭގައި ރޭ ހިނގި އެކްސިޑެންޓެއްގައި ޕާކް ކޮށްފައި އޮތް ކާރެއްގައި ޕިކަޕަކުން ޖެހި ހަތަރު މީހަކަށް އެކި ވަރުގެ އަނިޔާތަކެއް ލިބެއްޖެއެވެ.
ފުލުހުންގެ މީޑިއާ އޮފިޝަލަކު ވިދާޅުވީ، އެ އެކްސިޑެންޓް ހިނގާފައި ވަނީ ރޭ ދަންވަރު ހިރިޔާ ސްކޫލް ކައިރިން، ކަނބާ އައިސާ ރަނި ހިނގުމުގައި ކަމަށެވެ.
އެނގިފައިވާ ގޮތުގައި ޕިކަޕް ދުއްވަން އިނީ ބިދޭސީ އެކެވެ. އަދި ކޮންޓްރޯލް ނުވެ ޕިކަޕްވަނީ ޕާކް ކޮށްފައި އޮތް ކާރުގައި ޖެހި މައިތިރިވެފައެވެ. އަދި އަނިޔާވި ހަތަރު މީހުންނަކީ އެ ވަގުތު ޕާކް ކޮށްފައި އޮތް ކާރު ކައިރީގައި ތިބި ހަތަރު މީހުން ކަމަށް ވެސް ވަނީ އެނގިފައެވެ.
މަންޒަރު ދުށް މީހަކު ބުނީ ހަތަރު މީހުންގެ ތެރެއިން ފަރުވާއަށް އެކަކު ވަނީ އައިޖީއެމްއެޗަށް ގެންގޮސްފައި ކަމަށެވެ. އެއީ ޕިކަޕުން ޖެހި ބޯ ފަޅައިގެން ގޮސް ހޭނެތުނު މީހެކެވެ. ނަމަވެސް އޭނާގެ ހާލު ސީރިއަސް ކަމެއް ނުވަތަ ނޫން ކަމަށް ވެސް ނޭނގެއެވެ.
އެ އެކްސިޑެންޓްގައި ޕިކަޕުން ޖެހުނު ކާރުގެ ފަހަތް ވަނީ ވަރަށް ބޮޑަށް ބަނޑިވެ ގެއްލުންތަކެއް ލިބިފައެވެ. އަދި ޕިކަޕަށް ވެސް ވަނީ އެކިވަރުގެއް ގެއްލުންތައް ލިބިފައެވެ.