07 Jan 2019, 21:39
ކުރީގެ ރައީސް އަބްދުﷲ ޔާމީން އަބްދުލް ގައްޔޫމް އިސްވެ ހުންނަވައިގެން އުފައްދާ ސިޔާސީ ޕާޓީ، ޕީޕަލްސް ނޭޝަނަލް ނޭޝަނަލް ކޮންގްރެސް (ޕީއެންސީ) އަށް ކުރީގެ ޑިފެންސް މިނިސްޓަރު އާދަމް ޝަރީފް އުމަރު ސޮއި ކުރައްވައިފިއެވެ.
އާދަމް ޝަރީފް މިރޭ "ސަން" އަށް ވިދާޅުވީ މިއަދު ޕީއެންސީއާ އޭނާ ގުޅިވަޑައިގަތީ ޕީޕީއެމްގައި ހުރެގެން މުސްތަގުބަލެއް އޮތް ކަމަށް ދެކެވަޑައިނުގަންނަވާތީ ކަމަށެވެ.
"ކަންތައްތައް ހިނގަމުންދާގޮތަށް ބަލާއިރު، މިހާރު މިހިނގަމުންދާހޮތަކަށެއް ޕީޕީއެމް ނުއެއް ހިނގާނެ. އެހެންވީމަ މުސްތަގުބަލެއް ޕީޕީއެމްގައި ނެތް ކަމަށް އަޅުގަނޑަށް ގަބޫލުކުރެވޭތީ ޕީއެންސީއާ މި ގުޅުނީ،" އާދަމް ޝަރީފް ވިދާޅުވިއެވެ.
އޭނާ ވިދާޅުވީ ޕީޕީއެމްގެ ގިނަ މެމްބަރުންތަކެއް އެޕާޓީ ދޫކޮށް ޕީއެންސީއަށް ސޮއިކުރާނެ ކަމަށެވެ.
"އަޅުގަނޑު މަސައްކަތް ކުރި މަޑުއްވަރީ ދާއިރާއަށް ބަލާއިރު، ދެތިން ދުވަހެއްގެ ތެރޭގައި މަޑުއްވަރީން އެކަނި 200 މީހުން ވަނީ ސޮއިކޮށްފައި. އަދި މީދޫން އެއަށްވުރެ ގިނައިން ވަނީ ސޮއިކޮށްފައި،" އާދަމް ޝަރީފް ވިދާޅުވިއެވެ.
ކުރީގެ ރައީސް މައުމޫން އަބްދުލް ގައްޔޫމާއި އަބްދުﷲ ޔާމީން އަބްދުލް ގައްޔޫމަށް ތާއީދު އޮތް މިންވަރު ރިޔާސީ އިންތިޚާބުގެ ނަތީޖާ އިން ފެންނަން އެބަ އޮތް ކަމަށާއި އެންމެ ބޮޑު ތާއީދެއް އޮތީ ޔާމީނަށްކަން އަދަދުން ފެންނަން އެބަ އޮތް ކަމަށް އާދަމް ޝަރީފް ވިދާޅުވިއެވެ.
"ހިސާބުގެ އަދަދުތަކުން އެއޮތީ ވަރަށް ރަނގަޅަށް ފެންނަން، ރައީސް ޔާމީނަށް ލިބިވަޑައިގެންނެވި ވޯޓު. ދެން ހަމަ ކޯލިޝަނަށް ލިބުނު ވޯޓުވެސް ފެންނަން އެބައޮތް. ކޯލިޝަނަށް ލިބުނު ވޯޓު ހަތަރު ބަޔަށް ބަހައިފި ކަމަށް ވެއްޖެއްޔާ އެއީ ވަރަށް ކުޑައެއް ޗެއް ރައީސް މައުމޫނަށް. މިވަގުތު ރާއްޖޭގައި ތިއްބެވި ލީޑަރުންނަށް ބަލާއިރު އެންމެ ގިނަ ވޯޓު ހޯއްދެވި ބޭފުޅަކީ ރައީސް ޔާމީން،" އާދަމް ޝަރީފް ވިދާޅުވިއެވެ.
ޕީއެންސީ ރަޖިސްޓްރީ ކުރުމަށް މާދަމާ އިލެކްޝަންސް ކޮމިޝަނަށް ހުށަހަޅުއްވާނެ ކަމަށް ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ ވަނީ ވިދާޅުވެފައެވެ.