01 Jan 2019, 13:23
އާ އަހަރުގެ މުނާސަބަތުގެ ތަހުނިޔާއާއެކު ރެއިން ފެށިގެން ސޯޝަލް މީޑިއާގައި ގިނަ ބަޔަކު ދިޔައީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަށް އުފަންދުވަހުގެ ތަހުނިޔާވެސް ފޮނުވަމުންނެވެ. ނަމަވެސް އެކި މަސްދަރުތަކުގައި ރައީސްގެ އުފަން ތަރީޚު އޮތީ އެކި ގޮތަށެވެ. ރަނގަޅު ގޮތަކީ ކޮބާހެއްޔެވެ؟
އޮންލައިން އެންސައިކްލޮޕީޑިއާ، ވިކިޕީޑިއާގައި ވާ ގޮތުން ރައީސް ސޯލިހުގެ އުފަންދުވަހަކީ 1 މެއި 1964 އެވެ. ވިކިޕީޑިއާއަކީ ކޮންމެ މީހަކަށްވެސް މައުލޫމާތު އެޑިޓުކުރެވޭ އެއްޗަކަށް ވުމާއެކު މިއީ އިތުބާރުކުރެވޭ މައުލޫމާތެއް ނޫނެވެ. އެހެން ނަމަވެސް ގިނަ ބަޔަކު ގަބޫލުކޮށްގެން ހުރީ ރައީސްގެ އުފަން ދުވަހަކީ ވިކިޕީޑިއާގައި އޮތް ގޮތަށް، 1 މެއި ކަމަށެވެ.
ނަމަވެސްރަސްމީ ލިޔެކިޔުންތަކުގައި އޮންނަ ގޮތުން ރައީސް ސޯލިހުގެ އުފަން ތާރީޚަކީ1 މާޗު 1962އެވެ. ނިމިދިޔަ ރިޔާސީ އިންތިހާބުގެ ވޯޓާސް ރަޖިސްޓްރީގައި ވެސް އޮތީ އެފަދައިންނެވެ.
ސުވާލު އުފެދެނީ ރައީސް ސޯލިހުއަށް އުފަން ދުވަހުގެ ތަހުނިޔާ މިއަދު ފޮނުވަމުން ދާތީއެވެ.
ސަންއަށް އެނގިފައިވާ ގޮތުގައި ރައީސް ސޯލިހުގެ އުފަންދުވަހުގެ ގޮތުގައި އެމަނިކުފާނުގެ އާއިލާއިން އަބަދުވެސް ފާހަގަކުރަމުން އަންނަނީ 1 ޖެނުއަރީއެވެ. އެހެން ނަމަވެސް ރަސްމީ ގޮތުން އެމަނިކުފާނުގެ އުފަން ތާރީޚަކީ މާޗު 1 އެވެ.
ރައީސް ސޯލިހުގެ ގާތް ބޭފުޅުން މިއަދު އެމަނިކުފާނުގެ އުފަން ދުވަސް ފާހަގަކުރަމުން އަންނަ އިރު، މިއަދަކީ އެމަނިކުފާނުގެ ކެބިނެޓުގެ ހައުސިންގް އެންޑް އާބަން ޑިވެލޮޕްމެންޓް މިނިސްޓަރު އައިމިނަތު އާތިފާ ޝަކޫރާއި ކޮއްކޯފުޅު؛ އިދިކޮޅު ޕީޕީއެމްގެ ނައިބު ރައީސާ އާއިޝަތު އާޒިމާ ޝަކޫރުގެ ވެސް އުފަން ދުވަހެވެ.