31 Dec 2018, 08:47
ނަވާރަސަތޭކަ ހަތްދިހައިގެ އަހަރުތަކުން ފެށިގެން ނުވަދިހައިގެ އަހަރުތަކާ ހަމައަށް "ކޮމެޑީ ކިންގް"ގެ ގޮތުގައި މަޝްހޫރު ބޮލީވުޑްގެ ވެޓެރަން އެކްޓަރު ކާދަރު ޚާން މަރުވެއްޖެ ކަމަށް ބުނެ ދައުރުވަމުން އަންނަ މީޑިއާ ރިޕޯޓުތައް އޭނާގެ ފިރިހެން ދަރި، ސަރްފަރާޒް ދޮގުކޮށްފިއެވެ.
ނޭވާލާން އުނދަގޫވެގެން ކާދިރު ކެނެޑާާގެ ހޮސްޕިޓަލެއްގައި އެޑުމިޓުކޮށް ފަރުވާ ދޭން ފެށީ މި މަހުގެ 28 ވަނަ ދުވަހުއެވެ.
ރޭ އިރާކޮޅު ކާދިރުގެ މަރުގެ ޚަބަރުތައް ވަނީ ދައުރުވާން ފަށައިފައެވެ. ނަމަވެސް ކާދިރުގެ ދަރި ބުނީ އެ ވާހަކަތަކުގައި އެއްވެސް ހަގީގަތެއް ނެތް ކަމަށެވެ.
"އެއީ ހުސް ދޮގު. ބައްޕަ އޮތީ ހޮސްޕިޓަލުގައި"، ސަރްފަރާޒް ބުންޏެވެ.
އުމުރުން 81 އަހަރުގެ ކާދިރު ހޮސްޕިޓަލުގައި އެޑްމިޓު ކުރީ ނޭވާލާން އުނދަގޫވެގެންނެވެ. އަދި މިހާރު ކާދިރު ނޭވާ ލަމުން އަންނަނީ ޚާއްސަ ވެންޓިލޭޓަރެއްގެ އެހީގައި ކަމަށް ރިޕޯޓުތައް ބުނެއެވެ.
އާއިލާ އާއި ހަވާލާދީ ބައެއް ރިޕޯޓުތައް ބުނާގޮތުން، ކާދަރަށް ވާހަކަ ނުދެއްކޭ އިރު ނިއުމޯނިއާގެ އަލާމާތްތައް ވެސް އަންނަނީ ފެންނަމުންނެވެ.
މިދިޔަ އަހަރު ކާދަރު ވަނީ ކަކުލުގެ އޮޕަރޭޝަނެއްކޮށްފައެވެ. ޚަބަރުތައް ބުނާ ގޮތުން އޮޕަރޭޝަން ގޯސްވެ، އޭގެ ފަހުން ކާދަރަށް ރަނގަޅަށް ނުހިނގެއެވެ. ކާބުލް އަށް އުފަން ކާދަރު ބޮލީވުޑަށް ނުކުތީ 1973 ވަނަ އަހަރު ރިލީޒްކުރި ރާޖޭޝް ކަންނާގެ ފިލްމު 'ދާގް' އާއެކުއެވެ. އެއަށްފަހު އޭނާ ވަނީ ފިލްމީ ކެރިއަރު ނިންމާލުމާ ހަމައަށް 300 އަށް ވުރެ ގިނަ ފިލްމުގައި މަސައްކަތް ކޮށްފައެވެ. އޭގެ ތެރޭގައި 'މުޖްސެ ޝާދީ ކަރޯގީ'، 'ޖީނާ ސިރްފް މޭރޭ ލިޔޭ'، 'ޖޯރޫ ކާ ގުލާމް'، އަދި 'ބެނާރަސީ ބާބޫ' ފަދަ ފިލްމުތައް ފާހަގަކޮށްލެވެއެވެ.
އެކްޓަރެއްގެ އިތުރުން ކާދިރަކީ ފާހަގަކޮށްލެވޭ ސްކްރީން ރައިޓަރެކެވެ. ފިލްމީ ދާއިރާ އާއި ދުރަށް ޖެހުމަށް ފަހު ކާދިރު ދިރިއުޅެމުން އަންނަނީ އޭނާގެ ދަރިފުޅާ އެކު ކެނެޑާގައެވެ.