26 Dec 2018, 20:17
ރައީސް އިބްރާހިމް މުހައްމަދު ސޯލިހުގެ ސަރުކާރުން މަސައްކަތް ކުރަމުން ދަނީ، ސިވިލް ސާވިސްގެ މުވައްޒަފުންގެ ވަޒީފާތައް މަދުކޮށް، ސިޔާސީ މަގާމުތައް އިތުރު ކުރަން ކަމަށާއި، މިހާރުވެސް މި ސަރުކާރަކީ މަތިބަރު ކަމުގެ ރެކޯޑު އޮތް ސަރުކާރެއް ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެ އެވެ.
އުމަރު މިހެން ވިދާޅުވެފައި މިވަނީ، ސިވިލް ސާވަންޓުން ވަޒީފާއިން ވަކި ކުރަން ނުވަތަ ބަދަލު ކުރާނޭ ގޮތުގެ އުސޫލެއް ސިވިލް ސާވިސް ކޮމިޝަނުން އެކުލަވާލައި އެއަށް އަމަލު ކުރަން ފަށާފައިވާ ދަނޑިވަޅެއްގަ އެވެ. އަދި ބައެއް ސިވިލް ސާވަންޓުންގެ ވަޒީފާ ގެއްލިދާނެތީ އެ މުވައްޒަފުން ކަންބޮޑުވުން ފާޅު ކުރަމުންދާ ދަނޑިވަޅެއްގަ އެވެ.
މިއަދު "ސަން" އާ ވާހަކަ ދައްކަވަމުން އުމަރު ވިދާޅުވީ، މީގެ ކުރިން ވެސް ސަރުކާރުތަކުގައި ފެނިގެން ގޮސްފައި ވަނީ ގިނަ އަދަދެއްގެ ބޭކާރު ސިޔާސީ މަގާމުތަކެއް އުފެއްދި މަންޒަރު ކަމަށެވެ. ނަމަވެސް، މިހާތަނަށް އެފަދަ އެންމެ ގިނަ މަގާމުތައް އުފައްދާފައިވާ ސަރުކާރަކީ މިއަދުގެ ސަރުކާރު ކަމަށް އުމަރު ވިދާޅުވި އެވެ.
އޭނާ ވިދާޅުވީ، ސިޔާސީ މަގާމުތައް އިތުރުުވުމުން ބަޖެޓަށް ބާރު ބޮޑުވާ ކަމަށެވެ. އަދި ނަތީޖާއެއްގެ ގޮތުން، އެކަން ހައްލު ކުރަން ދަށް މަގާމުތަކުގައި ތިބޭ މުވައްޒަފުން ވަޒީފާއިން ވަކި ކުރަން ޖެހޭ ކަމަށް ކަމަށް އޭނާ ވިދާޅުވި އެވެ.
"މި ސަރުކާރުން މި ފެންނަނީ [މަގާމުތަކަށް ބޭފުޅުން އައްޔަން ކުރުން] މެކުހަށް ޖަހައިގެން ކުރިއަށްދާ ތަން. ސްޓޭޓު މިނިސްޓަރުން ވެސް މިހާރު އެ ތިބީ އައްޔަން ކޮށްފައި ދުވަހަކު ވެސް ދިވެހި ރާއްޖޭގައި ސްޓޭޓު މިނިސްޓަރުން އައްޔަން ނުކުރާ އަދަދަކަށް. އެހެންވީމާ މިއީ ރާއްޖޭގައި ރެކޯޑެއް،"
އޭނާ ވިދާޅުވީ، ސިވިލް ސާވިސް އިން ވަކި ކުރަނީ ތައުލީމާއި ތަޖުރިބާ ހުރި މަސައްކަތުގައި ގިނަ ދުވަސްވީ މީހުން ކަމަށެވެ. އަދި އެމީހުން ވަކި ކުރުމަށް ފަހު މަތީ މަގާމުތަކަށް ލަނީ ގާބީލުކަމެއް ނެތް ބައެއް ކަމަށް އޭނާ ވިދާޅުވި އެވެ.
"ތައުލީމީ، އެތައް ޒަމާނެއް ވަންދެން މަސައްކަތްކޮށްފައި ހުރި ތަޖުރިބާ ހުރި މީހުން ވަކި ކުރަނީ ދަށުން. ވަކިކޮށްފައި، މައްޗަށް އެ ލަނީ ތައުލީމެއް އުޑެއް ބުޑެއް ނުދަންނަ އެތައް ބަޔަކު،" އުމަރު ވިދާޅުވި އެވެ.
އަދި ސިޔާސީ މަގާމުތައް އިތުރު ކުރުމުގެ ނަތީޖާއެއްގެ ގޮތުން އުމުރުން ދުވަސްވީ މީހުންނަށް ދޭ އިނާޔަތްތައް ކުޑަ ކުރުމާއި، ޓެކްސްގެ ގޮތުގައި ނަގާ ފައިސާ އިތުރުު ކުރަން ޖެހުން ފަދަ ކަންތައްތައް މުސްތަގުބަލުގައި ފެންނާނޭ ކަމަށް ވެސް އުމަރު ވިދާޅުވި އެވެ.
"ރާއްޖޭގައި މިހާތަނަށް އުފެދުނު އެންމެ މަތިބަރު ސަރުކާރު މި ސަރުކާރަކީ. މި ހާހިސާބަށް، ރާއްޖޭގައި ސަރުކާރު އުފެދުމުގެ ފަހުން، ސަރުކާރުތައް އުފެދިގެން ވަރަށް ޒަމާން ވެދާނެތާ މިހާރު، ރަސްކަން ނިމި ގޮސްފަ. މިއީ މިހާތަނަށް އުފެދުނު އެންމެ މަތި ބަރު ސަރުކާރު އަދި އެންމެ ނާގާބިލު މީހުން މައްޗަށްލާ ސަރުކާރު އިނގޭތޯ."
"މިނިސްޓްރީ ބަހައިގެން މުވައްޒަފުން ވަކި ކުރާ ވާހަކަ އަކީ ޖޯކެއް"
ކުރީގެ ހައުސިން އެންޑް އިންފްރާސްޓްރަކްޗާ މިނިސްޓްރީ މިހާރު ދެ މިނިސްޓްރީއަކަށް ބަހާލުމުން، އިއްޔެ އަމަލު ކުރަން ފެށި ސިވިލް ސާވިސްގެ މުވައްޒަފުން ވަޒީފާއިން ވަކި ކުރުމުގެ އުސޫލުގެ ދަށުން، އެ ދެ މިނިސްޓްރީގެ ބައެއް މުވައްޒަފުންގެ ވަޒީފާ ގެއްލިގެންދާނޭ ކަމުގެ އަޑުތައް ވަނީ ފެތުރިފަ އެވެ. އަދި އެ މުވައްޒަފުން އެކަމާ މެދު ދަނީ ކަންބޮޑުވުން ފާޅު ކުރަމުންނެވެ.
އެ ކަމާ ގުޅިގެން ސިވިލް ސާވިސް ކޮމިޝަނުން ނެރުނު ބަޔާނެއްގައި ބުނެފައި ވަނީ އެއްވެސް އިދާރާއެއްގެ އޮނިގަނޑަށް އަންނަ ބަދަލަކާ ގުޅިގެން އެއްވެސް މުވައްޒަފެއްގެ ވަޒީފާއެއް ނުގެއްލޭނޭ ކަމަށެވެ. އަދި އިދާރާއެއްގެ އޮނިގަނޑަށް އަންނަ ބަދަލަކާ ގުޅިގެން އެއްވެސް މުވައްޒަފަކު ވަޒީފާއިން ދޫކޮށްލަންޖެހޭ ހާލަތެއް މެދުވެރިވެއްޖެނަމަ، ބަދަލުގައި އެކަށޭނެ އެހެން ވަޒީފާއެއް އެހެން އިދާރާއަކުން ހޯދުމަށް ކުރަން ޖެހޭ މަސައްކަތްތައް ކޮމިޝަނުން ކުރާނެ ކަމުގެ ޔަގީންކަން ދޭ ކަމަށް އެ ބަޔާނުގައި ބުނެފައިވެ އެވެ.
އޮފީސްތަކުގައި މަސައްކަތް ކުރާ މުވައްޒަފުން ވެލާނާގެ ބޭރުގައި --- ސަން ފޮޓޯ/ އަހްމަދު މުޖުތަބާ
އެކަމާ ގުޅިގެން އުމަރު ވިދާޅުވީ، އެ ވާހަކަތަކަކީ "ޖޯކެއް" ކަމަށާއި، ސަރުކާރުން މަސައްކަތް ކުރަމުން ދަނީ އިދާރީ އުކުޅެއް ބޭނުންކޮށްގެން ވީހާވެސް ގިނަ މުވައްޒަފުން ވަޒީފާއިން ވަކި ކުރުމަށް ކަމަށެވެ.
"ފުރަތަމަ ކަމަކަށް މިނިސްޓްރީ ބަހައިގެން މުވައްޒަފުން ވަކި ވާ ވާހަކަ އެއީ ހުސް ޖޯކެއް. އެއީ ހަމަ މުވައްޒަފުން ވަކި ކުރަން ވެގެން ކުރާ ކަމެއް. މިސާލަކަށް ފެނަކައިގައި ހުންނަ މުވައްޒަކު ވަޒީފާއިން ވަކި ކުރަން ވެއްޖެއްޔާ މި ހަދާ ގޮތަކީ އޭނާ މި ރަށުން އެހެން ރަށަކަށް ބަދަލު ކުރަނީ. ބަދަލު ކުރީމަ އޭނައަށް އުނދަގޫ ވާނެތާ އެ ރަށެއްގައި އުޅެން. ދެން ކެނޑިގެން ދަނީ. އެކަހަލަ އިދާރީ އުކުޅެއް ބޭނުންކޮށްގެން ވަޒީފާއިން ވަކި ކުރާ ކުރުމެއް މި ފެންނަ މަންޒަރަކީ،"
ރައީސް ޔާމީންގެ ސަރުކާރުގައި އުވާލި މޯލްޑިވްސް ރޯޑް ޑިވޮލޮޕްމެންޓު ކޯޕަރޭޝަންގެ 709 މުވައްޒަފުންގެ ވަޒީފާގެ ކޮންޓްރެކްޓު އަންނަ ފެބްރުއަރީ މަހު ހަމަވާ އިރު އެ މީހުންގެ ވަޒީފާއާ މެދު މިހާރު ވަނީ ސުވާލު އުފެދިފަ އެވެ. ކުރިން ހައުސިން މިނިސްޓްރީން ބުނެފައި ވަނީ އެ މުވައްޒަފުންގެ ވަޒީފާގެ އެއްބަސްވުން ތިން އަހަރަށް އިތުރު ކުރާނެ ކަމަށެވެ. ނަމަވެސް އެކަމުގެ ނިޝާނެއް އަދި ނުފެނެ އެވެ.
އެކަމާ ގުޅިގެން އުމަރު ވިދާޅުވީ، އެމްއާރްޑީސީގައި މަސައްކަތް ކުރި މުވައްޒަފުންނަށް ވެސް މި ސަރުކާރުގައި ވަޒީފާ ލިބޭނޭ ކަމަށް އޭނާ ގަބޫލުފުޅު ނުކުރައްވާ ކަމަށެވެ.
ރައީސް ސޯލިހުގެ ސަރުކާރުގައި މިހާތަނަށް ސްޓޭޓް މިނިސްޓަރު ފެންވަރުގެ މަގާމުތަކަށް 45 ބޭފުޅަކު ވަނީ އައްޔަން ކޮށްފަ އެވެ. އަދި ޑެޕިއުޓީ މިނިސްޓަރު ފެންވަރުގެ މަގާމުތަކަށް 50 ބޭފުޅުން ވަނީ އައްޔަން ކޮށްފަ އެވެ. އަދިވެސް ބައެއް މިނިސްޓްރީތަކަށް ދަނީ ބޭފުޅުން އައްޔަން ކުރަމުންނެވެ.
ކުރީގެ ރައީސް ނަޝީދުގެ ސަރުކާރުގައި ސިވިލް ސާވިސްގެ ގިނަ އަދަދެއްގެ މުވައްޒަފުންނަށް އެއްފަހަރާ ގިނަ އަދަދެއްގެ ފައިސާ ދިނުމަށް ފަހު ވަނީ ވަޒީފާއިން ވަކި ކޮށްފައެވެ. އެގޮތުން އޭރު ވަޒީފާއިން ވަކިވެގެން ދިޔަ ފަރާތްތަކުގެ ތެރޭގައި ދައުލަތުގެ ޚަރަދުގައި ވަކި ޚާއްސަ ދާއިރާތަކުން މަތީ ތަޢުލީމު ޙާސިލްކޮށްފައިވާ ފަރާތްތައްވެސް ހިމެނޭކަން ފާހަގަކޮށްލެވެއެވެ. އޭރު އެގޮތަށް އަމަލުކޮށްފައި ވަނީ، ސަރުކާރުގެ ސިޔާސީ މަގާމުތައްވެސް ވަރަށް ބޮޑަށް އިތުރުކޮށްފައި ވަނިކޮށެވެ.