24 Dec 2018, 19:57
ސިޔާސީ ޕާޓީތަކުގެ ދަރަންޏަށް ޕާޓީގެ މާލީ އެންމެ އިސްވެރިޔާ ޒިންމާ ނަގަން ޖެހޭ ގޮތަށް ގާނޫނަށް ބަދަލު ގެންނަން ޖެހޭ ކަމަށް އިލެކްޝަން ކޮމިޝަންގެ މެމްބަރު އަދި ތަރުޖަމާނު އަހުމަދު އަކުރަމް ވިދާޅުވެއްޖެ އެވެ.
މިއަދު ކުރެއްވި ޓްވީޓެއްގައި އަކުރަމް ވިދާޅުވީ، ސިޔާސީ ޕާޓީތަކުގެ ދަރަންޏަށް ޕާޓީގެ މާލީ އެންމެ އިސްވެރިޔާ ޒިންމާ ނަގަން ޖެހޭ ގޮތަށް ގާނޫނަށް ބަދަލު ގެންނަން ޖެހޭ ކަމަށާއ،ި އެހެން ނަހަދައިފި ނަމަ، ޕާޓީތައް ދަރަނިވެރިވެ ނެތި ހިނގައިދާނެ ކަމަށެވެ.
Siyaasee party thakuge dharannah e dharani negi iru e party ge maalee ehme isveriyaa zinmaa kurevey gothah gaanoonah islaah gennan jehey. Ehen noonee party thah dharani verive nethi hingaidhaane.
— Ahmed Akram (@akram4535)December 24, 2018
ނޮވެމްބަރ 6، 2016: އިލެކްޝަން ކޮމިޝަންގެ ފަރާތުން ނޫސްވެރިންނަށް މައުލޫމާތު ދިނުން -- ސަން ފޮޓޯ/ ފަޔާޒު މޫސާ
އޭނާ އެހެން ވިދާޅުވެފައި މިވަނީ، ޕީޕަލްސް ނޭޝަނަލް ކޮންގްރެސްގެ ނަމުގައި ޕާޓީއެއް އުފެއްދުމަށް ޕީޕީއެމްގެ ނައިބު ރައީސް އަބްދުލް ރަހީމް އަބްދުﷲ ހުށަހަޅުއްވާފައި ވަނިކޮށެވެ. އަދި އެ ޕާޓީ އުފެއްދުމަށް ފަހު އެ ޕާޓީގެ ލީޑަރު އަދި ކުރީގެ ރައީސް ޔާމީން އެ ޕާޓީއަށް ބަދަލުވެވަޑައިގަންނަވާނެ ކަމަށް އަޑުފެތުރިފައި ވަނިކޮށެވެ.
ޔާމީން އެހެން ޕާޓީއަކަށް ބަދަލުވާން އުޅުއްވާ އިރު، ރިޔާސީ އިންތިހާބުގެ ކެމްޕެއިން ދުވަސްވަރު ޕީޕީއެމްގެ މެންބަރުން މޯލްޑިވިއަންގެ ބޯޓުތަކުގައި ކުރި ދަތުރުތަކަށް ޕީޕީއެމް އިން މޯލްޑިވިއަން އަށް 3.8 މިލިއަން ރުފިޔާ ދައްކަން ޖެހިފައިވާ ކަމަށް ޕީޕީއެމް އިން މީގެ ކުރިން ވަނީ ބުނެފަ އެވެ.
އަކުރަމް މިއަދު އެހެން ވިދާޅުވެފައިވާ އިރު، ދިވެހި ރައްޔިތުންގެ ޕާޓީ (ޑީއާރްޕީ) ދޫކުރައްވައި ކުރީގެ ރައީސް މައުމޫން ވަޑައިގެންނެވި އިރު އެ ޕާޓީ އަށް ވަނީ ގިނަ އަދަދެއްގެ ފައިސާ ދައްކަން ޖެހިފަ އެވެ. އެ ފައިސާ ދައްކަން ޖެހުނީ އެ ޕާޓީގެ ލީޑަރު ކަމާ ވަގުތީ ގޮތުން ހަވާލުވެވަޑައިގެންނެވި މުހައްމަދު ނަޝީދު (ކާނަލް) އަށެވެ.