09 Dec 2018, 15:34
ފަތުރުވެރި ކަމަށް ދޫކުރާ ރަށްތަކުގެ ތިމާވެށި ދިރާސާތައް ހަދަން އެންވަޔަވަރަމެންޓް ޕްރޮޓެކްޝަން އެޖެންސީ (އީޕީއޭ) އަށް އަލުން ދޭން ޓުއަރިޒަމާ ބެހޭ ގާނޫނަށް އިސްލާހު ހުށަހަޅައިފި އެވެ.
ފަތުރުވެރި ކަމަށް ރަށްތައް ދޫކުރާއިރު އެންވަޔަރަމެންޓް އެސެސްމެންޓް ހެދުން އެންމެ ފުރަތަމަ ދީފައި އޮތީވެސް އީޕީއޭއަށެވެ. ނަމަވެސް ކުރީގެ ނައިބު ރައީސް އަދި ޓުއަރިޒަމް މިނިސްޓަރު އަހުމަދު އަދީބުގެ ޓުއަރިޒަމް މިނިސްޓަރު ކަމުގެ ދަށުން އެ ބާރު ވަނީ ޓުއަރިޒަމް މިނިސްޓްރީގެ ދަށަށް ނަގަން ގާނޫނު ބަދަލު ކޮށްފަ އެވެ.
ފަތުރުވެރި ކަމަށް ދޫކުރާ ރަށްތަކުގެ ތިމާވެރި އެސެސްމެންޓް ހަދަން އީޕީއޭއަށްދޭ ގޮތަށް ގާނޫނަށް އިސްލާހު ހުށަހެޅުއްވީ ހިތަދޫ ދެކުނު ދާއިރާގެ މެމްބަރު އަލީ ނިޒާރު އެވެ.
ހިތަދޫ އުތުރު ދާއިރާގެ މެމްބަރު އަލީ ނިޒާރު
ނިޒާރު 'ސަން' އަށް ވިދާޅުވީ ކުރިން އީޕީއަށް ދީފައި އޮތް ބާރު އަލުން އެ އެޖެންސީއަށް ދިނުމަށް ޓުރިޒަމާ ބެހޭ ގާނޫނަށް އިސްލާހު ހުށަހަޅާފައިވާނެ ކަމަށެވެ. އެ ބިލުގެ ފުރަތަމަ ކިޔުން އިއްވުން މާދަމާގެ މަޖިލީހުގެ ޖަލްސާއަށް ވަނީ އެޖެންޑާ ކޮށްފަ އެވެ.
ޓޫރިޒަމާ ބެހޭ ގާނޫނުގެ 15 ވަނަ މާއްދާގެ (ހ)ގައި ބުނެފައި ވަނީ ޓޫރިޒަމަށް ދޫކުރާ ރަށްރަށާއި ފަޅުއަދު ބިމުގެ ތިމާވެރި އެސެސްމެންޓް ހެދުމާއި ވެއްޓަށް ބަދަލެއް ގެންނަ ނަމަ އެ ބަދަލު ގެނައުމުގެ ކުރިން ތިމާވެއްޓަށް ލިބޭނެ ގެއްލުން ދެނެގަނެ އަސަރު ފޯރާ މިންވަރު ދެނެގަތުމުގެ ހުރިހާ ބާރެއް ލިބިގެން ވަނީ ޓުރިޒަމާ ބެހޭ މިނިސްޓްރީ އަށް ކަމަށެވެ.
ވެއްޓަށް ލިބޭ ގެއްލުން ދެނެގަތުމުގެ ބާރު އީޕީއަށް ދިނުމުން ވެއްޓަށް ބަދަލެއް ގެންނަ ނަމަ އެކަން އީޕީއަށް އަންގަން ޖެހޭ ގޮތަށް ގާނޫނަށް ވަނީ އިސްލާހު ހުށަހަޅައިފަ އެވެ.