05 Dec 2018, 15:14
މާލޭގައި ފެންބޮޑުވެ، މަގުމަތީ ޕާކުކޮށްފައި ހުރި ވެހިކަލްތައް އޮޔާދާތީ ސަމާލުވުމަށް ފުލުހުން އިލްތިމާސްކޮށްފި އެވެ.
ފުލުހުން މިއަދު ކުރި ޓުވީޓެއްގައި ބުނީ މިހާރު ކުރަމުންދާ ވިއްސާރައާ ގުޅިގެން މާލޭގެ މަގުތަކުގައި ފެންބޮޑުވެ، ޕާކުކޮށްފައި ހުރި ބައެއް ސައިކަލުތައް ވެއްޓިފައި ވާތީ މަގުހިނގާ މީހުންނާއި ދުއްވާއެއްޗެހީގައި އުޅޭ މީހުން ސަމާލުވުމަށް އިލްތިމާސް ކުރާ ކަމަށެވެ.
ކުރިއަށް އޮތް 24 ގަޑިއިރު ވެސް ބޯކޮށް ވާރޭވެހޭނެ ކަމަށް މެޓުން ވަނީ ލަފާކޮށްފަ އެވެ. ފުލުހުން ވަނީ ވިއްސާރައިގެ ސަބަބުން ލިބިދާނެ ގެއްލުންތައް ކުޑަކުރުމަށް އަޅަން ޖެހޭ ފިޔަވަޅުތައް އެޅުމަށް ވެސް އިލްތިމާސް ކޮށްފަ އެވެ.
މާލޭ މަގުތަކުގައި ފެންބޮޑުވުން -- ސަން ފޮޓޯ: މުޒައްޔިން
މަގުތަކުގައި ފެންހެދިފައި އޮންނަ ވަގުތުތަކުގައި ބާރު ސްޕީޑުގައި ނުދުއްވުމަށާއި މިދުވަސްވަރަކީ ވިއްސާރެވެ، ވައިގަދަ ދުވަސްވަރަކަށްވުމާއެކު ސިނަމާލެ ބްރިޖާއި ރިންގް ރޯޑުގައި ސައިކަލު ދުއްވާ ފަރާތްތަކުން ސަމާލުވުމަށް ފުލުހުން ވަނީ އިލްތިމާސްކޮށްފަ އެވެ.
މީގެ އިތުރުން ކަނޑު ދަތުރަށް ފުރާއިރު ސަލާމަތީ ކަންތައް ފުރިހަމަކުރުމަށް ވެސް ފުލުހުން ވަނީ އިލްތިމާސް ކޮށްފަ އެވެ.
މާލެއަށް ބޯކޮށް ވާރޭވެހި ފެންބޮޑުވުމުގެ ސަބަބުން ބައެއް ސަރަހައްދުތަކުގައި ވަނީ ކަކުލާ ހަމައަށް ފެންބޮޑުވެފަ އެވެ. ފެންބޮޑުވުމުގެ ސަބަބުން ބައެއް ގޭގެއަށާއި އިމާރަތްތަކަށް ފެންވަދެ ކަރަންޓު ކެނޑިފައިވާ އިރު އެމްއެންޑީއެފް އިން ދަނީ ޕަމްޕު ޖަހައިގެން ފެން ހިންދުމުގެ މަސައްކަތް ކުރަމުންނެވެ.
މެޓް އޮފީހުން ބުނީ މިއަދު ހެނދުނު ދިހަޔަކުްނ ފެށިގެން މެންދުރު އެކަކާހަމައަށް މާލެއަށް 44 މިލިމީޓަރުގެ ވާރޭ ވެހިފައިވާ ކަމަށެވެ. ވިއްސާރަވެ ބޯކޮށް ވާރޭވެހޭތީ ހއ. އިން އއ އަތޮޅާ ހަމައަށް ވަނީ ޔެލޯ އެލާޓުވެސް ނެރެފަ އެވެ.