29 Nov 2018, 15:48
ރަށްރަށުން ގަސް ކަނޑުމަކީ ކުޑަކަމެއް ނޫން ކަމަށާއި އެކަންކުރުން ހުއްޓާލާނެ ކަމަށް އެންވަޔަރަމަންޓް މިނިސްޓަރު ޑރ. ހުސައިން ރަޝީދު ހަސަން ވިދާޅުވެއްޖެ އެވެ.
"ތިމާވެށި މައްތިނި" ނަމުގައި ރަށްރަށުގެ ކައުންސިލަރުންނަށް ކުރިއަށް ގެންދާ ބައްދަލުވުން އިފްތިތާހުކުރުމަށް ޝީ ބިލްޑިންގައި މިއަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު ވިދާޅުވީ ގަސްގަހަކީ މުޖުތަމައުއަށް އެއިން ގިނަ ފައިދާތަކެއް ކުރަނިވި އެއްޗެއް ކަމަށެވެ.
ގާނޫނާ ގަވާއިދާ ހިލާފަށް އެފަދަ ކަންތައްތައް ކުރުމުން ޝަކުވާ ބޮޑުވަމުން އަންނަ ކަމަށް ވެސް މިނިސްޓަރު ވިދާޅުވި އެވެ.
"މި ކަހަލަ ކަންތައްތައް ކުރުމަށް އެއްވެސް ބޭފުޅަކު ހިއްވަރު ނުދެއްވުމަށް އެދެން. އަދި ދެކޮޅު ހެއްދެވުމަށް ތަކުރާރުކޮށް ވަސިއްޔަތް ކުރަން. ޖަންގަލީގައި ހެދިފައިވާ ރުއް ގަސް ގަސް ނުނެގުމަށް އާދޭހާ އެކު ދަންނަވަން،"
ހުސައިން ވިދާޅުވީ ރާއްޖެއަށް މިހާރު ކުރިމަތިވެފައިވާ އެންމެ ބޮޑު މައްސަލައަކީ ކުނީގެ މައްސަލަ ކަމަށާއި އެ މައްސަލަ ހައްލުނުކޮށް ޖަޒީރާ ރާއްޖެ، ޖަޒީރާ ގައުމެއްގެ ގޮތުގައި އަންނަން އޮތް ޖީލުތަކަށް ގެންދެވޭނެ ގޮތެއް ނޯންނާނެ ކަމަށެވެ.
"ތިމާވެށީގެ މައްސަލަތައް ހައްލުކުރެވޭނީ ކައުންސިލަރުންނަށް އެކަމުގެ ސައްހަ މައުލޫމާތު ދީގެން. ސައްހަ މައުލޫމާތު ކައުންސިލަރުންނަށް އެނގިގެން. ވެށި ހިމާޔަތްކުރުމަކީ އެންމެންގެ ޒިންމާއެއް،"
ބައްދަލުވުމުގައި ބައިވެރިވާ ބައެއް ކައުންސިލަރުން--- ފޮޓޯ/ އެންވަޔަރަމަންޓް
ކައުންސިލްތަކަށް މަސައްކަތް ކުރެވޭނެ ގޮތް ހަމަޖައްސައިދީފި ނަމަ ޒިންމާދާރުކަމާ އެކު އެ މަސައްކަތް ކުރާނެ ކަމުގެ ޔަގީންކަން އެބައޮތް ކަމަށް މިނިސްޓަރު ވެސް ވިދާޅުވި އެވެ.
މިނިސްޓަރު އިތުރަށް ވިދާޅުވީ ކޮންމެ ރައްޔިތަކު ވެސް އެމީހަކު އުފައްދާ ކުންޏާ މެދު ޒިންމާވާންޖެހޭނެ ކަމަށެވެ.
"ރާއްޖެއަކީ ގުދުރަތީ ރީތިކަން މަޝްހޫރުކޮށްގެން އެ ވިއްކައިގެން އާމްދަނީ ހޯދާ ގައުމެއް. މިގޮތަށް ކަންތައްތައް ވާނަމަ އެމީހުން ބޭނުންވާ ގޮތަށް ވެސް ރާއްޖެ ނުބޭއްވޭނެ،"
މިއަދު އެ ބައްދަލުވުމުގައި ބައިވެރިވެފައި ވަނީ އއ. އދ. އަދި ކ. އަތޮޅުގެ 60 ކައުންސިލަރުންނެވެ.