29 Nov 2018, 13:54
ކޮލަމްބޯ (ނޮވެމްބަރު 29): ސްރީ ލަންކާގެ ދާހިލީ ހަނގުރާމައިގައި ހިންގި ޖަރީމާތައް ފޮރުވަން މަސައްކަތް ކުރުމުގެ ތުހުމަތުގައި އެގައުމުގެ ޗީފް އޮފް ޑިފެންސް ސްޓާފް ރަވިންދުރަ ވިޖެގުނެރަޓްނާ ހައްޔަރުކޮށްފި އެވެ.
ޕްރޮސެކިއުޓަރުން ވިދާޅުވާ ގޮތުގައި ވިޖެގުނެރަޓްނާ ވަނީ، 11 ޒުވާނަކު މަރާލިކަމުގެ ތުހުމަތު ކުރެވިފައިވާ ނޭވީ އޮފިސަރަކު ހިމާޔަތްކޮށްފަ އެވެ.
އެމަރާލި ޒުވާނުންގެ ހަށިގަނޑު އަދި ވެސް ފެނިފައި ނުވާ ކަމަށާއި އޭގެ ތެރޭގައި ގިނައީ ޓަމިލް ދަރިކޮޅުގެ މީހުން ކަމަށް ރިޕޯޓުތަކުގައިވެ އެވެ. އަދި އެ މައްސަލާގައި ތުހުމަތު ކުރެވޭ ނޭވީ އޮފިސަރު ވަނީ މިދިޔަ އޮގަސްޓް މަހު ހައްޔަރުކޮށްފަ އެވެ.
ވިޖެގުނެރަޓްނާ ހައްޔަރު ކުރުމަށް މިމަހު ތިން އަމުރެއް ނެރެފައިވެ އެވެ. ނަމަވެސް އޭނާ ހައްޔަރު ކުރީ އިއްޔެ އަމިއްލައަށް ކޯޓަށް ހާޒިރުވުމުންނެވެ.
ވިޖެގުނެރަޓްނާ ކަފާލާތުގެ ދަށުން ދޫކޮށްލުމަށް އޭނާގެ ވަކީލުން އެދުނު ނަމަވެސް ކޯޓުން ވަނީ އަންނަ މަހުގެ ފަހެކާ ހަމަޔަށް މުއްދަތު ޖަހައިފަ އެވެ.
ލަންކާގެ ސަރުކާރާއި ޓަމިލް ހަނގުރާމަވެރިންނާ ދެމެދު 26 އަހަރުވަންދެން ކުރި ހަނގުރާމާގައި ދެ ފަރާތުން 100،000 އަށް ވުރެ ގިނަ މީހުން މަރުވެފައިވެ އެވެ.