29 Nov 2018, 08:58
ރާއްޖެއަށް ބޭރުގެ އެހީ ހޯދާނީ ރާއްޖޭގެ މިނިވަންކަމާއި އިސްތިގުލާލަށް ބުރޫ ނާރާނެގޮތުގެ މަތިންކަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެ އެވެ.
ޝާހިދު ރޭ ކުރެއްވި ޓްވީޓެއްގައި ވިދާޅުވީ ރާއްޖޭގައި އެއްވެސް ބޭރު ގައުމެއްގެ އަސްކަރީ މަރުކަޒެއް ހަދަން ފުރުސަތު ނުދެއްވާނެ ކަމަށެވެ. "އެފަދަ އެއްބަސްވުމެއް އެއްވެސް ގައުމަކާ ނުކުރެވޭނެ،" ކަމަށް ވެސް އެ ޓްވީޓުގައި ވިދާޅުވެފައިވެ އެވެ.
Raajje ah beyruge ehee hoadhaanee raajjey ge minivankamaa isthiqlaal ah buruleh naaraane gothuge mathin. Raajjeygai evves beyru qawmegge askaree marukazeh hadhaakah futusatheh nudheynan. E fadha ebbasvumeh evves qawmakaa nukureveyne!
— Abdulla Shahid ???? (@abdulla_shahid)November 28, 2018
ފޮރިން މިނިސްޓަރު ޝާހިދު މިފަދަ ޓްވީޓެއް ކުރައްވާފައި މިވަނީ އިންޑިއާ އިން ރާއްޖެ އަށް އެއް ބިލިއަން ޑޮލަރުގެ ލޯން އެހީ ދޭން ހުށަހަޅާފައިވާ ކަމަށާއި އެ އެހީ ދޭނީ ބަދަލުގައި އިންޑިއާ ސިފައިން ރާއްޖޭގައި ބޭތިއްބުމަށާއި އިންޑިއާ އާއި ރާއްޖެއާ ދެމެދު މިލިޓަރީ ގުޅުން ވަރުގަދަ ކުރުމަށް ޝަރުތުކޮށް ކަމަށް މީޑިއާތަކުގައި ހަބަރު ފަތުރަމުން ދަނިކޮށެވެ.
އިންޑިއާ ސަރުކާރުގެ އޮފިޝަލުންތަކަކާ ހަވާލާދީ އެ ގައުމުގެ ބައެއް ނޫސްތަކުން ރިޕޯޓުކޮށްފައި ވަނީ، މި މަހުގެ 17 ވަނަ ދުވަހު ރައީސް އިބްރާހިމް މުހައްމަދު ޞާލިހު އިންޑިއާއަށް ކުރައްވާ ދަތުރުފުޅުގެ ކުރިން، ދެ ގައުމުގެ މެދުގައި ހެދޭ އެއްބަސްވުމުގައި ޝަރުތު ކުރާ ކަންތައްތައް ނިންމާނެ ކަމަށެވެ.
ދެގައުމުގެ މެދުގައި ވެވޭ އެއްބަސްވުމުގެ ދަށުން ރާއްޖޭގައި އިންޑިއާ ސިފައިން ބައިތިއްބާނެ ކަމަށް އިންޑިއާގެ ނޫސްތަކުން ރިޕޯޓު ކުރާ އިރު، ޗައިނާ އާ ރާއްޖެ ދުރުވުމަށް ވެސް އެބަސްވާ ކަމަށް އެ ނޫސްތަކުން ވަނީ ރިޕޯޓު ކޮށްފަ އެވެ.
އިންޑިއާ އިންދޭ އެހީގެ ތެރޭގައި ބަޖެޓް ސަޕޯޓަށް ދޭ އެހީ ވެސް ހިމެނޭކަމަށް ރިޕޯޓުތައް ބުނެ އެވެ.
ފޮރިން މިނިސްޓަރާއި އިތުރު ވަޒީރުންތަކެއް އިންޑިއާއަށް ކުރެއްވި ދަތުރުފުޅަށް ފަހު މިހާރު ވަނީ ޔޫއޭއީއަށް ވަޑައިގެންފަ އެވެ.
އިންޑިއާ އިން ރާއްޖެ އަށް "ހަދިޔާ ކުރި" ދެ ހެލިކޮޕްޓަރު ބެލެހެއްޓުމަށް ރާއްޖޭގައި 60 ވަރަކަށް ސިފައިން ތިބި އެވެ. ރައީސް އަބްދުﷲ ޔާމީންގެ ސަރުކާރުން އެ ދެ ހެލިކޮޕްޓަރު އަނބުރާ ފޮނުވާލުމަށް އެދުމުން ވެސް އިންޑިއާ އިން ދެ ހެލިކޮޕްޓަރެއް ނުގެންދެ އެވެ. އަދި ސިފައިންގެ ވިސާ އާ ނުކޮށްދިނުމުން ވެސް އެ އެމީހުން އަނބުރާ ނުގެންގޮސް އިންތިހާބު ނިމެންދެން އިންޑިއާ އިން އޮތީ މަޑުކޮށްގެންނެވެ.
ދެހާސް ދިހަ ވަަނަ އަހަރު ދެ ސަރުކާރު ދެމެދުގައިވި އެއްބަސްވުމުގެ ދަށުން ދެ ހެލިކޮޕްޓަރު ދުއްވާނެ ދިވެހިން ތަމްރީންކޮށް ދިވެހިންނާ އެ ދެ އުޅަނދު ހަވާލުކުރަން ޖެހެ އެވެ. ނަމަވެސް މިހާތަނަށް ވެސް އެކަން ކޮށްފައެއް ނުވެ އެވެ.
އެ 60 ވަރަކަށް ސިފައިންނަށް ކާންބޯންދީ ހުންނާނެ ތަން ހަމަޖައްސައިދޭން ޖެހެނީ ވެސް ދިވެހި ސަރުކާރުންނެވެ.