29 Nov 2018, 00:16
އަންހެނުން މައްސަރު ދުވަސްވަރު ބޭނުންކުރާ ޕެޑާއި ޓެމްޕެކްސް ފަދަ ބާވަތްތަކުން ނަގާ ޓެކްސް ކަނޑާލުމަށް ސަރުކާރުގެ ފަރާތުން މަޖިލީހަށް ހުށަހެޅި ބިލު ރައްޔިތުންގެ މަޖިލީހުން ފާސްކޮށްފި އެވެ.
މުދާލާ ހިދުމަތުން ޓެކްސް ނެގުމުގެ ގާނޫނަށް އިސްލާހުގެނައުމަށް ކުރެންދޫ ދާއިރާގެ މެންބަރު އަބްދުލް ބާރީ އަބްދުﷲ ހުށަހެޅުއްވި އިސްލާހު ފާސްވީ މިރޭ ރައްޔިތުންގެ މަޖިލިސް އިން ބޭއްވި ޖަލްސާގައި ނެގި ވޯޓުގައި ބައިވެރިވި 73 މެންބަރުންގެ އިއްތިފާގުންނެވެ.
އެ ބިލާ ގުޅޭ ގޮތުން މަޖިލީހުގައި ބަހުސް ކުރެއްވި ހުރިހާ މެންބަރުން ވެސް ވަނީ ޕެޑުން ޖީއެސްޓީ ކަނޑާލަން ތާއީދު ކުރައްވާ ވާހަކަ ދައްކަވައިފަ އެވެ. ނަމަވެސް ބައެއް މެމްބަރުން ވިދާޅުވެފައި ވަނީ ޖީއެސްޓީ ކަނޑާލިޔަސް ފިހާރަތަކުން އެތަކެތި ވިއްކާ އަގު ކޮންޓްރޯލު ކުރެވޭނެ ގޮތެއް ނެތި ބިލުގެ އެންމެ އެދެވޭ ފައިދާ ރައްޔިތުންނަށް ނުކުރާނެ ކަމަށެވެ.
އެހެން ކަމުން ފިހާރަ ތަކުން އެފަދަ ތަކެތި ވިއްކާ އަގު ކޮންޓްރޯލު ކުރާނެ ގޮތްތަކެއްވެސް ކަނޑައަޅަން ޖެހޭ ކަމަށް މެންބަރުން ވަނީ ވިދާޅުވެފައެވެ.
"ޓެކްސް ކަނޑާލިޔަސް އަގު ތިރިއެއް ނުކުރެވޭ. އަގު ތިރިކުރެވިގެން ދިޔަތޯ ބެލުމަކީ މުހިންމު ކަމެއް. މޮނިޓަރިންގް މެކަނިޒަމެއް ބޭނުންކޮށްގެން އެކަމުގެ ފައިދާއާ މަންފާ ލިބޭކަން ޔަގީންކުރަންޖެހޭ،" ބަހުސް މަރުހަލާގައި އައްޑޫ މީދޫ ދައިރާގެ މެމްބަރު ރޮޒޭނާ ވިދާޅުވިއެވެ.
ޕެޑާއި ޓެމްޕެކްސް ފަދަ ބާވަތްތަކުން ޓެކްސް ކަނޑާލުމަަކީ ރައީސް އިބްރާހިމް މުހައްމަދު ސޯލިހުގެ ފުރަތަމަ 100 ދުވަހުގެ ވައުދެކެވެ.