28 Nov 2018, 16:28
ފަސް މިނިސްޓްރީއަކަށް ހަ ސްޓޭޓް މިނިސްޓަރަކު ރައީސް އިބްރާހިމް މުހައްމަދު ސޯލިހް އައްޔަނު ކުރައްވައިފިއެވެ.
މިއަދު އައްޔަނުކުރެއްވި ސްޓޭޓް މިނިސްޓަރުންގެ ތެރޭގައި ތެރޭގައި ކޮމިއުނިކޭޝަން އަދި ސައިންސް މިނިސްޓްރީއަށް އަހްމަދު އަފްޒަލް އިބްރާހިމް، އެޑިއުކޭޝަން މިނިސްޓްރީއަށް ފާތިމަތު ނަސީރު، ޓްރާންސްޕޯޓު އެންޑް ސިވިލް އޭވިއޭޝަން މިނިސްޓްރީއަށް އަހްމަދު ޒުހައިރު އަދި ޓޫރިޒަމް މިނިސްޓްރީއަށް އަހްމަދު ސޯލިހު ހިމެނެއެވެ.
މީގެ އިތުރުން ހެލްތު މިނިސްޓްރީއަށް ދެ ސްޓޭޓު މިނިސްޓަރުން ވަނީ އައްޔަނުކޮށްފައެވެ. އެއީ މުހައްމަދު ޒުހައިރު އަދި ޑރ. ޝާހު އަބްދުﷲ މާހިރެވެ.
ރައީސް އޮފީހުން މިއަދު ބުނި ގޮތުގައި، ސިޔާސީ މަގާމުތަކާއި ކުންފުނިތަކުގެ ބޯޑުތަކަށް އައްޔަނުކުރާ މީހުން ފުރިހަމަކުރަން ޖެހޭ މައުލޫމާތު ފޯމެއް އެކުލަވާލައި، އެ ފޯމު ފުރިހަމަކުރަން ޖެހޭ ގޮތަށް ރައީސް އިބްރާހިމް މުހައްމަދު ސޯލިހު ހަމަޖައްސަވާފައިވާ ކަމަށެވެ.