28 Nov 2018, 10:23
ސިވިލް ސާވިސް ކޮމިޝަން (ސީއެސްސީ)ގެ މެމްބަރު ކަމަށް ކުރިމަތިލެއްވި ފަރާތްތަކުގެ ތެރެއިން އެޑިއުކޭޝަން މިނިސްޓްރީގެ ކުރީގެ ޑިރެކްޓަރު ޖެނެރަލް ފާތިމަތު އާމިރާއަށް އެންމެ މަތިން މާކްސް ލިބިއްޖެއެވެ.
ސީއެސްސީ މެމްބަރަކަށް މިހާރު ހުންނެވި ފާތުމަތު ރީނީ އަބްދުއްސައްތާރުގެ ދައުރު މި މަހުގެ ފަހު ކޮޅު ހަމަވާނެއެވެ. އެހެން ކަމުން އޭނާގެ ބަދަލުގައި މެމްބަރެއް އައްޔަން ކުރަން ވަނީ ޖެހިފައެވެ.
ސިވިލް ސާވިސް ކޮމިޝަނަށް އައްޔަން ކުރުމަށް ގާބިލް މީހެއް ކަމަށް ކަނޑައަޅަނީ ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމެޓީން، ކަނޑައަޅާފައިވާ މިންގަނޑަށް ބަލައި، އިންޓަވިއު ކޮށްގެންނެވެ. އެ މަގާމަށް ގާބިލު ކަމަށް ބެލެވޭނީ މާކްސް ދިނުމުން އެވްރެޖް 75 ޕަސެންޓަށް ވުރެ މަތިން މާކްސް ލިބުމުންނެވެ.
ސީއެސްސީގެ މެމްބަރު ކަމަށް ކުރިމަތިލި 13 މީހެއްގެ ނަން މިނިވަން މުއައްސަސާތަކުގެ ކޮމިޓީން ވަނީ ދިރާސާކޮށްފައެވެ.
އޭގެ ތެރެއިން އެންމެ ގިނައިން މާކްސް ލިބުނީ އާމިރާ އަށެވެ. އާމިރާއަށް ވަނީ 89 ޕަސެންޓު މާކްސް ލިބިފައެވެ.
އާމިރާއަކީ ތައުލީމީ ދާއިރާއަށް ގިނަ ހިދުމަތް ކުރައްވާފައިވާ ފަރާތެކެވެ. އެނާ ވަނީ ސީއެޗްއެސްސީގެ ޕްރިންސިޕަލް ކަމުގެ އިތުރުން އެޑިއުކޭޝަން މިނިސްޓްރީގައި ވެސް މަސައްކަތް ކުރައްވާފައެވެ.
އާމިރާގެ އިތުރުން ދެން 75 އިންސައްތައަށް ވުރެ ގިނައިން މާކްސް ލިބުނީ ތ. ހިރިލަންދޫ ލިލީގެ، އަބްދުލްރަހީމް ހަސަން އާއި މ. ވެލަގަލަ، މުހައްމަދު މާހިދު ޝަރީފަށެވެ. އަބްދުއްރަހީމް ހަސަނަށް 83.4 ޕަސެންޓް ލިބުނު އިރު މުހައްމަދު މާހިދު ޝަރީފަށް ލިބުނީ 79.5 ޕަސެންޓު މާކްސް ލިބުނެވެ.
އެ ތިން ބޭފުޅުންގެ ތެރެއިިން މެމްބަރު ކަމަށް ހޮވާނީ ކޮން ބޭފުޅެއް ކަން ނިންމާނީ، އެކަމާ މެދު ގޮތެއް ނިންމުމަށް މަޖިލީހުގެ ތަޅުމަށް ހުށަހަޅުމުން ފަހު މަޖިލީހުގެ ތަޅުމުން ނަގާ ވޯޓަކުންނެވެ.