22 Nov 2018, 12:03
އިތުރު ޕާޓީއެއް އުފެއްދެވުމުގެ މަސައްކަތް ކުރީގެ ރައީސް އަބްދުﷲ ޔާމީން އަބްދުލްގައްޔޫމު ނުކުރައްވާ ކަމަށް ޔާމީން ސަރުކާރުގެ ލީގަލް އެފެއާޒް މިނިސްޓަރު އައިޝަތު އާޒިމާ ޝުކޫރު ވިދާޅުވެއްޖެ އެވެ.
ޔާމީން އަބްދުލްގައްޔޫމު ނިސްބަތްވާ ޕީޕީއެމްގެ ބޭފުޅަކު ޕާޓީއެއް އުފެއްދުމަށް ބޭނުންވާ ފޯމު އިލެކްޝަންސް ކޮމިޝަނުން ނަގާފައިވާ ކަމަށް ބުނެ، އެ ކޮމިޝަނުގެ މެމްބަރު އިސްމާއިލް ހަބީބު ވަނީ ޓްވީޓެއް ކުރައްވައިފަ އެވެ.
ހަބީބު އެ ޓްވީޓް ކުރެއްވީ ޕީޕީއެމްގެ ޕީޖީ ލީޑަރު އަހުމަދު ނިހާން ހުސައިން މަނިކު ކުރެއްވި ޓްވީޓަކަށް ރައްދު ދެއްވަމުންނެވެ. ނިހާން ވިދާޅުވީ އިދިކޮޅު ސިޔާސީ ޕާޓީއެއް ރާއްޖޭގައި އޮތަ ނުދިނުމަށް އިލެކްޝަނުން ކުރަމުންދާ މަސައްކަތް ހުއްޓާލުމަށް ގޮވާލާ ކަމަށެވެ.
ހަބީބު ވިދާޅުވީ ގާނޫނީ އިމުގެ ތެރެއިން ސިޔާސީ ޕާޓީތައް ހިންގުމަށް އިލެކްޝަނުން އެއްބާރުލުން ދޭނެ ކަމަށެވެ. އަދި ޕީޕީއެމްގެ އިސް މީހަކު ޕާޓީ އުފައްދާ ފޯމެއް އިއްޔެ ނަގާފައިވާ ކަމަށް ވެސް ހަބީބު ވަނީ ވިދާޅުވެފަ އެވެ.
ހަބީބު އެ ވިދާޅުވި ވިދާޅުވުމަށް ރައްދު ދެއްވައި އާޒިމާ ވިދާޅުވީ ޕީޕީއެމްގެ ކޮންގްރެސް ބާއްވާފައި ވަނީ އިލެކްޝަންސް ކޮމިޝަނުގެ މަންދޫބުން ތިބެގެން އަސާސީ ގަވައިދާ އެއްގޮތަށް ކަމަށެވެ. އަދި އިތުރު ސިޔާސީ ޕާޓީއެއް އުފައްދަވަން ޔާމީން މަސައްކަތްޕުޅު ނުކުރައްވާ ކަމަށް އާޒިމާ ވިދާޅުވި އެވެ.
ޕީޕީއެމް ކޮންގްރެސް ބަލައި ނުގަންނަން އިލެކްޝަންސް ކޮމިޝަނުން ނިންމި ނިންމުން ބާތިލުކޮށްދޭން ހައިކޯޓަށް ހުށަހެޅި މައްސަލާގައި މިއަދު އެކެއް ޖަހާއިރު ހުކުމް ކުރަން ވަނީ ތާވަލުކޮށްފަ އެވެ.
ޕީޕީއެމްގެ ކޮންގްރެސް ބަލައި ނުގަންނަން އިލެކްޝަނުން ނިންމާ ސަބަބުތަކެއް ވެސް ދެއްކެވި އެވެ. އެއީ ޕާޓީ ނޫން މެމްބަރުން ކޮންގްރެސްގައި ބައިވެރިވުމާއި އިސް މަގާމުތަކަށް ޕާޓީ ނޫން މީހުން ވާދަ ކުރުމެވެ.
އެ ކޮންގްރެސް ބަލައި ނުގަތުމުން ޕީޕީއެމްގެ ހިންގުމުގެ މަގާމު މިހާރު ވަނީ ހުސްވެފަ އެވެ. އެ ކޮންގްރެސްގައި ރައީސްއަކަށް އިންތިހާބު ކުރެއްވީ ޔާމީން އެވެ. ނަމަވެސް ރައީސް ކަމުގެ ދައުރު ނިމުމުން މުޝްތަޝާރުކަން ވަނީ އެމަނިކުފާނަށް ގެއްލިފަ އެވެ.