17 Nov 2018, 14:33
ބުއެނޮސް އައިރިސް (ނޮވެމްބަރު 17): މިދިޔަ އަހަރު 44 މީހުންނާ އެކު ދަތުރު ކުރަމުން ދަނިކޮށް ގެއްލުނު އާޖެންޓީނާގެ ކަނޑުގެ ސިފައިންގެ ސަބްމެރިން ފެނިއްޖެ ކަމަށް އެގައުމުގެ ނޭވީން ބުނެފި އެވެ.
މިދިޔަ އަހަރުގެ ނޮވެމްބަރު 15ގައި އޭއާރުއޭ ސަން ހުއަން ގެއްލުނީ އާޖެންޓީނާއާ 270 މޭލު ދުރުން ދަތުރު ކުރަމުން ދަނިކޮށެވެ. އެސަބްމެރިން ގެއްލުނުތާ ދެ ހަފްތާ ފަހުން އޭގައި ތިބި މީހުން ސަލާމަތް ކުރުމުގެ މަސައްކަތް ނޭވީން ހުއްޓާލި އެވެ.
ނަމަވެސް އެސަބްމެރިން ގެއްލުނުތާ އެއް އަހަރާއި އެއް ދުވަސްވީ ފަހުން ނޭވީން ވަނީ އެޓްލާންޓިކް ކަނޑުގެ 800 މީޓަރު އަޑިން އެސަބްމެރިން ފެނިފައިވާ ކަމަށް ބުނެފަ އެވެ.
އާޖެންޓީނާގެ ނޭވީން ކުރި ޓުވީޓެއްގައިވާ ގޮތުން އެމެރިކާގެ ކުންފުންޏަކުން ވަނީ ކަނޑުއަޑީގައި އޮތީ ސަން ހުއަންކަން ޔަގީންކޮށްދީފަ އެވެ.
އާޖެންޓީނާގެ ނޭވީން މީގެ ކުރިން ބުނެފައިވާ ގޮތުގައި ސަން ހުއަންއާ ގުޅުން ކެނޑުނީ ނޭވީ ބޭސްއަކަށް ދަތުރު ކުރަމުން ދަނިކޮށެވެ. އަދި އެސަބްމެރިން ގެއްލުނު ދުވަހު އޭގެ ކެޕްޓަން ވަނީ ސަބްމެރިންގެ ބެޓެރިއެއް ޝޯޓުވި ކަމަށާއި ފަހުން އެމައްސަލަ ހައްލު ކުރި ކަމަށް ރިޕޯޓުކޮށްފަ އެވެ.
ނަމަވެސް އޭގެ ފަހުން ސަން ހުއަން އޮތް ސަރަހައްދުން އެއްޗެއް ގޮވިކަން ފާހަގަ ކުރެވިފައިވާ ކަމަށާއި އެއީ އެސަބްމެރިން ކަމަށް ވެދާނެ ކަމަށް ނޭވީން ބުނެފައިވެ އެވެ.
އާޖެންޓީނާގެ ރައީސް މައުރީސިއޯ މަކްރީ ވަނީ ސަން ހުއަން އަށާއި އޭގައި ތިބި މީހުންނަށް ވީގޮތުގެ ހަގީގަތް ހޯދާނެ ކަމުގެ ޔަގީންކަން ދެއްވާފަ އެވެ.