14 Nov 2018, 11:20
ދިވެހި މުނިފޫހިފިލުވުމުގެ ދާއިރާއަށް އިންގިލާބީ ބަދަލެއް ގެންނާނެ އެޕްލިކޭޝަނެއް ކަމަށް ބެލެވޭ "ބައިސްކޯފު" ލޯންޗުކުރިތާ 24 ގަޑިއިރު ތެރޭގައި 1000އަށް ވުރެ ގިނަ މީހުން އެ އެޕްލިކޭޝަން ޑައުންލޯޑް ކޮށްފިއެވެ.
"ބައިސްކޯފު" އެޕް ލޯންޗުކުރީ މިދިޔަ ހޯމަ ދުވަހުގެ ރޭ ދަރުބާރުގޭގައެވެ. އެ އެޕް ލޯންޗުކުރުމަށް ވަނީ ހާއްސަ ހަފްލާއެއްވެސް ކުލަގަދަކޮށް ބާއްވާފައެވެ.
އެ އެޕް އަދި ޑައުންލޯޑު ކުރެވޭނީ ހަމައެކަނި ގޫގުލް ސްޓޯރުންނެވެ. އަދި ވަރަށް އަވަސް މުސްތަގުބަލެއްގައި އެޕަލް ސްޓޯރުން ވެސް އެޕް ޑައުންލޯޑު ކުރެވޭ ގޮތް ހަދަމުން އަންނަ ކަމުން "ބައިސްކޯފު" ޓީމުން ބުނެއެވެ.
ނޮވެމްބަރ 12، 2018: މުނިފޫހިފިލުވުމުގެ ދާއިރާއަށް ބޮޑު އިންގިލާބެއް ގެނެސްދޭނެ އެޕްލިކޭޝަން "ބައިސްކޯފް" ލޯންޗުކުރުމަށް ދަރުބާރުގޭގައި ބޭއްވި ރަސްމިއްޔާތުގެ ތެރެއިން -- ސަން ފޮޓޯ/ ފަޔާޒު މޫސާ
އެޕް ރިލީޒްކުރިތާ އެއް ދުވަސް ވީއިރު ލިބެމުންދާ ތަރުހީބަށް ބަލައިލާ އިރު ކުރިޔަށް އޮތްތާގައި އެ އެޕް ބޭނުން ކުރާ މީހުން ގިނަ ވާނެ ކަމަށް ބެލެވެއެވެ. އަދި އެޕަލް ސްޓޯރުން ޑައުންލޯޑު ކުރެވޭ ގޮތް ހެދުމުން އެޕަށް އޮންނަ ތަރުހީބު ބޮޑުވާނެ ކަން ގައިމެވެ.
"ބައިސްކޯފު" އަކީ ހުރިހާ އުމުރުފުރާއަކަށް އެކަށީގެންވާ ގޮތަށް ފަރުމާ ކުރެވިފައިވާ އެޕެކެވެ. އެ އެޕް އަކީ ރާއްޖޭން ބޭރުގެ ފަރާތްތަކަށް ވެސް ބެނުން ކުރެވޭނެ ގޮތަށް ގިނަ ފީޗާރސް ތަކެއް އެކުލަވަލައިގެން ލޯންޗުކޮށްފައިވާ އެޕެކެވެ.
ބައިސްކޯފު އެޕްލިކޭޝަން---
"ބައިސްކޯފު" މެދުވެރިކޮށް ދިވެހިލަވައިން ފެށިގެން ލައިވްކޮށް ޓީވީ ޗެނަލް ތައް ބަލާލުމުގެ ފުރުސަތު ފަހިވެފައި ވާއިރު ކުޑަކުދިންނަށް ހާއްސަ ކެޓެގަރީއެއް ވެސް ހިމެނެއެވެ. އަދި މަދަހަ، ވާހަކަ، ވެބް ސީރީޒްތައް، ދިވެހި ފިލްމު އަދި ކަރޯކޭއަށް ހާއްސަ ކެޓެގަރީތައް ވެސް ހިމެނެއެވެ.
އެ އެޕުން ދައްކާނެ ފުރަތަމަ ދިވެހި ވެބް ސީރީޒަކަށް ވާނީ ފާތިމަތު ނަހުލާގެ "ހުވާ" އެވެ. ބޮޑު ކާސްޓަކާއެކު ހަދާފައިވާ އެ ސީރީޒްގެ ޓްރެއިލާ މިހާރު އާންމުކޮށްފައިވާއިރު "ހުވާ" ދައްކަން ފަށާނީ މި މަހުގެ 29 ވަނަ ދުވަހުން ފެށިގެންނެވެ.