09 Nov 2018, 22:48
ކުރީގެ ނައިބު ރައީސް އަހުމަދު އަދީބަށް އައިޖީއެމްއެޗުގެ އިމަޖެންސީގައި ފަރުވާދެމުންދާކަމަށް އަދީބުގެ އަނބިކަނބަލުން މަރިޔަމް ނަޝްވާ ވިދާޅުވެއްޖެއެވެ.
ނަޝްވާ ކުރެއްވި ޓްވީޓެއްގައި ވިދާޅުވީ އަދީބުގެ ހާލު ގޯސްވެ އެމަޖެންސީގައި އެޑްމިޓުކުރެވިގެން ފަރުވާދެމުންދާ ކަމަށެވެ.
އަދީބުގެ ހާލު ގޯސްވެގެން މިދިޔަ މަހުވެސްވަނީ އައިޖީއެމްއެޗަށް ގެނެސް ޔޫރޮލޮޖިސްޓަކަށް ދައްކައިފައެވެ. އޭގެ ކުރިން އައިކެއާ އޮޕްޓިކަލްސްއަށްވެސް ޑޮކްޓަރަށް ދައްކާފައިވެއެވެ.
އަދީބަށް އައިޖީއެމްއެޗުގައި ފަރުވާދެމުންދާކަން އެ ހޮސްޕިޓަލުންވެސް ވަނީ "ސަން" އަށް ކަށަވަރުކޮށްދީފައެވެ. ހޮސްޕިޓަލުން ބުނީ އަދީބު ހޮސްޕިޓަލަށް ގެންދިޔައީ އަށެއް ޖަހާ އެހާކަށް ހާއިރު ކަމަށެވެ.
އަދީބަށް އައިޖީއެމްއެޗުގައި ފަރުވާދެމުން ދަނީ ކީއްވެކަން ހޮސްޕިޓަލުންވެސް އަދި އާއިލާ އިންވެސް ހާމައެއް ނުކުރެއެވެ.
އަދީބަށް ލޮލުގެ ނުރައްކާތެރި ބައްޔެއް ކަމަށްވާ ގުލުކޮމާ ޖެހި ސާޖަރީއެއް ހެދުމަށް ޑޮކްޓަރުން ލަފާދީފައިވާ ކަމަށް އާއިލާއިން ވަނީ ބުނެފަ އެވެ. ނަމަވެސް މެޑިކަލް ބޯޑުގެ ހުއްދަ ނުލިބިމުގެ ސަބަބުން މިއަދާ ހަމައަށް ވެސް ބޭސްފަރުވާއަށް އަދީބް، ރާއްޖެއިން ބޭރަށް ގެންދެވޭ ގޮތް ވެފައި ނުވާ ކަމަށް އާއިލާއިން ބުނެ އެވެ.
އެމްއެމްޕީއާރުސީގެ ކޮރަޕްޝަނާއި ރިޔާސީ ލޯންޗުކޮޅުގައި އެއްޗެއް ގޮއްވާލި މައްސަލާގައި، އަދީބުގެ މައްޗަށް ދައުލަތުން ކުރި ތިން ދައުވާއެއް ސާބިތުވެ 33 އަހަރުގެ ޖަލު ހުކުމެއް އަންނަނީ ތަންފީޒު ކުރައްވަމުންނެވެ. އަދި އެމްއެމްޕީއާރުސީގެ ހިޔާނާތުގެ ގިނަ މައްސަލަތަކެއްގައި އަދީބުގެ މައްޗަށް ދައުވާކޮށް، ޝަރީއަތްތައް ވެސް ދަނީ ހިންގަމުންނެވެ.