06 Nov 2018, 16:16
އައްޑޫ ސިޓީގައި ރައީސް ނަޝީދުގެ އޮފީހެއް މިއަދު ހުޅުވައިފި އެވެ.
ރައީސް ނަޝީދު މިއަދު މާލެ އިން އައްޑު އަށް ފުރުއްވައިވަޑައިގަތީ މެންދުރު 14:30 ހާއިރު އެވެ. އެމަނިކުފާނަށް މަރުހަބާ ދެންނެވުމަށް ގިނަ އަަދަދެއްގެ ބަޔަކު ވަނީ ގޮސްފަ އެވެ.
މިއަދު ހުޅުވި ރައީސް ނަޝީދުގެ އޮފީސް ހުންނަނީ އައްޑޫ ސިޓީ ހިތަދޫގަ އެވެ. އެ އޮފީސް މިއަދު ހުޅުއްވައިދެއްވީ އެމަނިކުފާނެވެ.
ރައީސް ނަޝީދުގެ އޮފީހެއް އައްޑޫގައި މިއަދު ހުޅުވާފައިވާ އިރު އެމަނިކުފާނުގެ އޮފީހެއް މާލޭގައި ވެސް ހިންގަ އެވެ.
އައްޑޫގައި ރައީސް ނަޝީދުގެ އޮފީހެއް ހުޅުވާފައި މިވަނީ އެމަނިކުފާނު ރައްޔިތުންގެ މަޖިލީހަށް ކުރިމަތިލައްވަން އުޅުއްވާ ކަމަށް އަޑު ފެތުރިފައި ވަނިކޮށެވެ. މަޖިލީހަށް ކުރިމަތިލެއްވުމާ ބެހޭ ގޮތުން އަދި އެމަނިކުފާނު ސީދާ ޖަވާބެއް ނުދެއްވަ އެވެ.
ކުރީގެ ރައީސުންގެ އޮފީސް ހިންގެވުމުގެ ހަރަދު ދެނީ ދައުލަތުންނެވެ. އެގޮތުން އެ އޮފީސްތައް ހިންގުމަށް ދައުލަތުން މަހަކު 87،000 ރުފިޔާ ދެ އެވެ.
ރައީސް ނަޝީދުގެ އައްޑޫ ދަތުރުފުޅަކީ އެމަނިކުފާނު މިނިވަންވެވަޑައިގަތުމަށް ފަހު ރާއްޖޭގެ ރަށަކަށް އެމަނިކުފާނު ކުރައްވާ ފުރަތަމަ ދަތުރުފުޅެވެ. މީގެ ކުރިން އެމަނިކުފާނު އައްޑުއަށް ފުރާވަޑައިގަތުމަށް ހަމަޖެހިފައި އޮތީ މި މަހުގެ ތިން ވަނަ ދުވަހު އެވެ. އެހެން ނަމަވެސް ދަތުރުފުޅު ފަސް ކުރެއްވީ މޫސުން ތަން ނުދިނުމުގެ ސަބަބުންނެވެ.