02 Nov 2018, 18:45
ވޮޝިންޓަން (ނޮވެމްބަރު 2): ތުރުކީގައި ހުންނަ ސައުދީ އަރަބިއާގެ ކޮންސިއުލޭޓު ތެރޭގައި މަރާލާފައިވާ ނޫސްވެރިޔާ ޖަމާލް ހާޝުގްޖީ އަކީ ނުރައްކާތެރި މީހެއް ކަމަށް ސައުދީ ވަލީ އަހުދު މުހައްމަދު ބިން ސަލްމާން ވިދާޅުވި ކަމަށް އެމެރިކާގެ މީޑިއާތަކުން ބުނެފި އެވެ.
ވޮޝިންޓަން ޕޯސްޓާއި ނިއު ޔޯކް ޓައިމްސްގައިވާ ގޮތުން ވަލީއަހުދު އެފަދައިން ވިދާޅުވީ، އެމެރިކާގެ ރައީސް ޑޮނަލްޑް ޓްރަމްޕުގެ ދަނބިދަރިކަލުން ޖެރަޑް ކުޝްނާ އާއި ގައުމީ ސަލާމަތާ ބެހޭ މުޝީރު ޖޯން ބޯލްޓަންއާ ފޯނުން ވާހަކަ ދައްކަވަމުންނެވެ.
އަދި އެފޯނު ކޯލުގައި ވަލީއަހުދު މުހައްމަދު ވަނީ ހާޝުގްޖީއަކީ ސައުދީން މަނާކޮށްފައިވާ ޖަމާއަތެއް ކަމަށްވާ މުސްލިމު ބްރަދަހުޑަށް ނިސްބަތްވާ މީހެއް ކަމަށް ވިދާޅުވެފަ އެވެ.
އެ ދެ ނޫހުގައިވާ ގޮތުން އެފޯން ކޯލު ކޮށްފައި ވަނީ މިދިޔަ މަހުގެ ނުވައެއްގަ އެވެ. އެއީ ހާޝުގްޖީ ކޮންސިއުލޭޓު ތެރޭ މަރާލިތާ އެއް ހަފްތާ ފަހުންނެވެ. އަދި އޭނާ މަރުވެފައިވާކަން ސައުދީން އެއްބަސްވުމުގެ ކުރިންނެވެ.
ނަމަވެސް ސައުދީ އަރަބިއާއިން ވަނީ ވަލީއަހުދު އެފަދައިން ވިދާޅުނުވާ ކަމަށް ބުނެފަ އެވެ.
އަދި ހާޝުގްޖީގެ އާއިލާއިން ވަނީ އޭނާ އަކީ ބްރަދަހުޑުގެ މެމްބަރެއް ނޫން ކަމަށާއި އޭނާ އަމިއްލައަށްވެސް އެކަމަށް އިންކާރުކޮށްފައިވާ ކަމަށް ބުނެފަ އެވެ.
ސައުދީ ޝާހީ އާއިލާއަށާއި ވަލީއަހުދަށް ފާޑު ކިޔަމުންދިޔަ ނޫސްވެރިޔެއް ކަމަށްވާ ހާޝުގްޖީގެ މަރާ އެއާއިލާއާ ގުޅުން އޮތް ކަމަށް ގިނަ އަދަދެއްގެ މީހުން ދަނީ ތުހުމަތު ކުރަމުންނެވެ.
ނަމަވެސް ސައުދީ ޝާހީ އާއިލާއިން ވަނީ އެތުހުމަތުތައް ދޮގުކޮށް، ހާޝުގްޖީގެ މަރުގެ ހަގީގަތް ހޯދާނެ ކަމަށް ބުނެފަ އެވެ. (ބީބީސީ)