01 Nov 2018, 16:18
ކެފޭއެއްގެ ތެރޭގައި ވަޅިން ހަމަލާދީ ހއ. ތަކަންދޫ، އިބްރާހިމީ ހިޔާ، ނަދީމު އަބްދުއްރަހީމް (ނަޑޭ)، 19، މަރާލި މައްސަލާގައި ދައުވާ އުފުލާފައިވާ ކުޑަ ކުއްޖާގެ ދައުވާ، ޖުވެނައިލް ކޯޓުން ބާތިލުކޮށްފި އެވެ.
ޕްރޮސެކިއުޓާ ޖެނެރަލްގެ އޮފީހުގެ އޮފިޝަލަކު ވަނީ މިކަން "ސަން"އަށް ކަށަވަރުކޮށްދީފަ އެވެ.
ނަދީމުގެ މަރުގެ މައްސަލާގައި ކުޑަކުއްޖެއްގެ މައްޗަށް ކުރީ ތޫނު އެއްޗެއް ބޭނުންކޮށްގެން ގަސްދުގައި މީހަކު މަރާލުމުގައި ބައިވެރިވުމުގެ ކުށުގެ ދައުވާ އެވެ.
"ސަން"އަށް އެނގިފައިވާ ގޮތުގައި އެ ދައުވާ ބާތިލުކުރެއްވީ ޖުވެނައިލް ކޯޓުގެ ގާޒީ އަބްދުލްބާރީ ޔޫސުފެވެ.
ނަދީމަށް ހަމަލާދީފައި ވަނީ 2017 ވަނަ އަހަރުގެ ޖުލައި 27 ވަނަ ދުވަހުގެ ރޭ ލޮނުޒިޔާރަތްމަގުގައި ހުންނަ ކެފޭއެއްގައި ކޮފީ ބޯން އިންދަ އެވެ.
ކުޑަ ކުއްޖާގެ އިތުރުން އިތުރު ތިން މީހެއްގެ މައްޗަށް އެ މައްސަލާގައި ދައުވާ އުފުލި އިރު، ފުލުހުން މީގެ ކުރިން ބުނެފައި ވަނީ ދައުވާ ލިބޭ މީހުންގެ މައްޗަށް ކުށް ކަމަށެވެ.