31 Oct 2018, 23:30
ތުރުކީގައި ހުންނަ ސައުދީ ކޮންސިއުލޭޓް ތެރޭގައި މަރާލި ނޫސްވެރިޔާ ޖަމާލް ޚާޝުގްޖީ އެތަނަށް ވަނުމާއެކުހެން ކަރުގައި ހިފައި މަރާލައިފައިވާ ކަަމަށް ތުރުކީން ބުނެފިއެވެ.
ތުރުކީން ބުނީ ނޫސްވެރިޔާ މަރާލީ ކުރިންވެސް ރާވައިފައިވާ ގޮތަށް ކަމަށެވެ. އަދި މަރާލުމަށްފަހު އޭނާގެ ހަށިގަނޑު ކޮށާލާ އެއްލާލައިފައިވާ ކަމަށްވެސް ތުރުކީން ބުންޏެވެ. މީގެ ކުރިން ސައުދީން ބުނީ ނޫސްވެރިޔާ މަރާލީ ކޮންސިއުލޭޓް ތެރޭގައި ހިނގި ތަލާ ފޮޅުމަކަށް ފަހު ކަމަށެވެ.
ނަމަވެސް ފަހުން ސައުދީން ވަނީ ނޫސްވެރިޔާ މަރާލީ ރާވައިގެންކަންފަހުން އެއްބަސްވެފައެވެ. ނަަމަވެސް އޭނާގެ ހަށިގަނޑުވީ ކޮންތާކުކަމެއް ސައުދީން ބުނެފައެއް ނުވެއެވެ.
ތުރުކީގެ ޗީފް ޕްރޮސިކިއުޓާ އިރުފާން ފިދާން ވިދާޅުވީ އެ މައްސަލައިގައި ސައުދީއާ ދެއްކިވާހަކަތަކުން އެއްވެސް ނަތީޖާއެއް ނުނުކުތް ކަަމަށެވެ.
ތުރުކީގެ ރައީސް ރަޖަބް ތައްޔިބް އުރުދުއާން އިއްޔެ ވަނީ އެ މައްސަލައިން ރެކެން ސައުދީގެ އިސްވެރިއަކު މަސައްކަތްކުރަމުންގެންދާ ކަމަށް ތުހުމަތުކުރައްވައިފައެވެ.
ޚާޝުގްޖީ ގެއްލިފައި ވަނީ މި މަހުގެ ދެވަނަ ދުވަހު ތުރުކީގެ އިސްތަންބޫލްގައި ހުންނަ ސައުދީ ކޮންސިއުލޭޓަށް ވަތް ފަހުންނެވެ. އެނާ އާއެކު ދިޔަ ހަދީޖާ ހުރީ ކޮންސިއުލޭޓު ބޭރުގަ އެވެ. އެގާރަ ގަޑިއިރު ވީއިރު ވެސް ޚަޝުގްޖީގެ ހަބަރެއް ނުވުމުން ހަދީޖާ ވަނީ އެކަން ކަމާބެހޭ ފަރާތްތަކަށް އަންގައިފަ އެވެ.
ސަައުދީގެ ރަސްގެފާނު ސަލްމާން ބިން އަލް ސައުދު ވަނީ ނޫސްވެރިޔާގެ މަރުގެ މައްސަލަ ތަހުގީގުކުރުމަށް ކޮމެޓީއެއްވެސް އެކުލަވާލައިފައެވެ. އެ ކޮމެޓީގައި އިސްކޮށް ހުންނަވަނީ ދަރިކަލުން މުހައްމަދު ބިން ސަލްމާންއެވެ. މުހައްމަދު ވަނީ އެ މައްސަލައިގައި އަދަބުލިބެން ޖެހޭ ހުރިހާ ފަރާތްތަކަށް ފުރިހަމައަށް އަދަބު ދެއްވާނެކަަމަށްވެސް ވައުދެވެވަޑައިގެންފައެވެ.