29 Oct 2018, 23:05
އޮޑިޓަ ޖެނެރަލް އޮފީހަށް ފެށޭ އަހަރު 52 މިލިއަން ރުފިޔާގެ ބަޖެޓެއް ދޭން ރައްޔިތުންގެ މަޖިލީހުގެ މާލިއްޔަތު ކޮމިޓީން ފާސްކޮށްފި އެވެ.
މިއަހަރު އޮޑިޓް އޮފީހަށް ދީފައިވަނީ 50 މިލިއަނުގެ ބަޖެޓެކެވެ. އޮޑިޓް އޮފީހުން މަޖިލީހަށް ބަޖެޓް ފޮނުވި އިރު އެދިފައިވަނީ ފެށޭ އަހަރަށް 60 މިލިއަން ރުފިޔާގެ ބަޖެޓެއް ފާސްކޮށްދިނުމަށެވެ.
އޮޑިޓް އޮފީހުން ހުށަހެޅި ރިޕޯޓު ދިރާސާ ކުރުމަށް ފަހު މާލިއްޔަތު ކޮމިޓީން ނިންމައި އާންމު ކުރި ރިޕޯޓުގައި ބުނެފައިވަނީ 2019 ވަނަ އަހަރަށް ފާސްކުރާ ބަޖެޓަކީ 52 މިލިއަން ރުފިޔާ ކަމަށެވެ. އަދި އޮޑިޓް އޮފީހުގެ މުޅި ޖުމްލަ ބަޖެޓު 60 މިލިއަން ރުފިިޔާއަށްވުރެ އިތުރު ނުވާ މިންވަރަށް ކޮންމެހެން ބޭނުންވެއްޖެ ހާލަތެއްގައި ކޮންޓިންޖެންސީ ބަޖެޓުން ނުވަތަ ހާއްސަ ބަޖެޓުން ފިނޭންސް މިނިސްޓްރީން ނިންމާ ގޮތަކަށް ކަމަޖެއްސުމަށް މާލިއްޔަތު ކޮމިޓީގެ ރިޕޯޓުގައި ވަނީ އަންގާފަ އެވެ.
އޮޑިޓް އޮފީހުން 2019 އަހަރަށް ލަފާކޮށް ހުށަހަޅާފައިވާ ބަޖެޓުގައި ހިނގާނެ ކަމަށް ލަފާކޮށްފައިވާ ހަރަދުތަކުގެ ތެރޭގައި މުވައްޒަފުންގެ މުސާރައާއި އެހެނިހެން އިނާޔަތްތަކަށް 41 މިލިއަން ހިނގާނެ ކަމަށް ވަނީ ލަފާކޮށްފަ އެވެ.
ހިނގާނެ ކަމަށް ލަފާ ކުރާ ހަރަދުތައް
- އޮޑިޓަ ޖެނެރަލްގެ މުސާރަޔާއި އެހެނިހެން އިނާޔަތްތަކަށް (795،000 ރުފިޔާ)
- މުވައްޒަފުންގެ މުސާރައާއި އެހެނިހެން އިނާޔަތްތަކަށް (41،046،000 ރުފިޔާ)
- ޕެންޝަން ފައިސާއަށް (1،203،392 ރުފިޔާ)
- މުވައްޒަފުން ތަމްރީނު ކުރުމާއި ފެންވަރު މަތިކުރުމަށް (1،658،875 ރުފިޔާ)
- މަސައްކަތްތައް ހިންގުމަށްޓަކައި ކުރަންޖެހޭ ދަތުރުފަތުރާއި އެހެނިހެން ކަންތައްތަކުގެ ހަރަދު (3،887،177 ރުފިޔާ)
- އޮފީހުގެ އިދާރީ ހަރަދު (12،010،556 ރުފިޔާ)
އެހުރިހާ ހަރަދަކަށް ޖުމްލަ 60،602،001 ރުފިޔާ ހަރުވާނެ ކަމަށް އޮޑިޓް އޮފީހުން މަޖިލީހަށް ފޮނުވި ރިޕޯޓުގައި ވަނީ ބުނެފަ އެވެ. އޮޑިޓް އޮފީހުގެ 2019 އަހަރުގެ ބަޖެޓް ފާސްކުރުން މާދަމާ ހެނދުނު ނުވައެއް ޖަހާއިރު ބާއްވާ ޖަލްސާއަށް ވަނީ ތާވަލުކޮށްފަ އެވެ.