29 Oct 2018, 09:12

ޖަކާޓާ(އޮކްޓޯބަރު 29): އިންޑޮނޭޝިއާގެ ވެރިރަށް ޖަކާޓާއިން ސުމަތުރާއަށް ދިޔުމަށް ނައްޓާލި ލަަޔަން އެއާގެ މަތިންދާބޯޓެއް ވެއްޓިއްޖެއެވެ.

އިންޑޮނޭޝިއާގެ ޓްރާންސްޕޯޓު މިނިސްޓްރީން ބުނި ގޮތުގައި ބޯއިން 737 މަރުކާގެ އެބޯޓު ވެއްޓުނީ 189 މީހުންނާ އެކު ދަތުރު ކުރަމުން ދަނިކޮށެވެ. އޭގެ ތެރޭގައި ތިން ކުޑަ ކުދިންނާއި އަށް ކުރޫ މެމްބަރުން ހިމެނެ އެވެ.

ނަމަވެސް ބޯޓުގައި ތިބި މީހުންނަށް ވީގޮތެއް އަދި ޔަގީން ނުވާ ކަމަށް އެގައުމުގެ ސާޗް އެންޑް ރެސްކިއު އޭޖެންސީން ބުންޏެވެ.

އެއާ ޓްރެކިން ސާވިސް، ފްލައިޓްޓްރޭޑާ 24ގައިވާ ގޮތުން އެބޯޓާ ގުޅުން ކެނޑުނީ، ބޯޓު ނައްޓާލިތާ 13 މިނިޓު ފަހުންނެވެ.

އިންޑޮނޭޝިއާގެ ޑިޒާސްޓާ އޭޖެންސީގެ ވެރިޔާ ސުޓޯޕޯ ޕުރުވޯ ނުގުރޮހޯ ވަނީ ބޯޓުގެ ބައިތަކާއި، އޭގައި ތިބި މީހުންނަށް ނިސްބަތްވާ ތަކެތި ފެނިފައިވާ ކަމަށް ވިދާޅުވެ ޓުވީޓެއް ކުރައްވާފައެވެ. އަދި އޭނާ ވަނީ ޖަކާޓާގެ އިރަށް އޮންނަ ކަރަވަންގު ކައިރިންވެސް، ބޯޓުގައި ތިބި މީހުންނަށް ނިސްބަތްވާ ތަކެތި ފެނިފައިވާ ކަމަށް ވިދާޅުވެފައެވެ.

ބަޖެޓު އެއާލައިނެއް ކަމަށްވާ ލަޔަން އެއާގެ ސީއީއޯ އެޑްވާޑް ސިރައިތު ވަނީ ބޯޓަށް ވީ ގޮތާ ބެހޭ ގޮތުން އަދި ވަކި އެއްޗެކޭ ބުނެވެން ނެތް ކަމަށާއި، އެހާދިސާއާ ބެހޭ މައުލޫމާތު ހޯދަމުންދާ ކަމަށް ވިދާޅުވެފައެވެ.