28 Oct 2018, 14:13
ވިއްސާރަވެ މޫސުން ގޯސްވާނެ ކަމަށް ލަފާކުރެވޭތީ މެދު ރާއްޖެތެރޭ އަތޮޅުތަކާއި ލ. އަތޮޅުން ސ. އަތޮޅާ ދެމެދުގެ ރަށްތަކަށް ޔެލޯ އެލާޓް ނެރެފި އެވެ.
މޫސުމާ ބެހޭ ގައުމީ އިދާރާ، މެޓުން ބުނީ އެ އަތޮޅުތަކަށް ބޯކޮށް ވާރޭ ވެހޭނެ ކަމަށެވެ. ޔެލޯ އެލާޓް ނެރެފައި ވަނީ މިއަދު އިރުއޮއްސި 18:00 އާ ހަމައަށެވެ. ވައި މަޑުވި ނަމަވެސް ހުރިހާ ހިސާބުތަކަށް ބޯކޮށް ވާރޭވެހުން އެކަށީގެންވާ ކަމަށް ވެސް މެޓް އޮފީހުން ބުންޏެވެ.
މެދުތެރެއާއި ދެކުނު އަތޮޅުތަކަށް ވައިޖެހޭނެ ކަމަށް ލަފާކޮށްފައި ވަނީ ހުޅަނގު ދެކުނާއި ހުޅަނގުން ގަޑިއަކު 10 މޭލާއި 18 މޭލު ދެމެދުގެ ބާރުމިނުގަ އެވެ.
ރާއްޖެއަށް ކުރަމުން ދާ ވިސްސާރަ -- ސަން ފޮޓޯ/ އަޙުމަދު އަވްޝަން އިލްޔާސް
މެޓުން ބުނީ ކުރިއަށް އޮތް 24 ގަޑިއިރު އުތުރު އަތޮޅުތަކަށް އިރާއި އިރުދެކުނުން ގަޑިއަކު 3 މޭލާ 10 މޭލު ދެމެދުގެ ބާރުމިނުގައި ވައިޖެހޭނެ ކަމަށް ލަފާކުރާ ކަމަށެވެ. އަދި ކެރިގަނޑުގައި ގަޑިއަކު ގާތްގަނޑަކަށް 35 މޭލު ބާރުމިނަށް ވައިގަދަވުން އެކަށީގެންވާ ކަމަށް މެޓުން ބުނެ އެވެ.
ރާއްޖެއަށް މިހާރު ކުރަމުންދާ ވިއްސާރަގައި މާލެ އަށް ވެސް ބޯކޮށް ވާރޭވެހި މާލޭގެ މަގުތަކުގައި ވަނީ ފެންބޮޑުވެފަ އެވެ.
މެޓް އޮފީހުން ބުނީ ރާއްޖޭގެ ހުރިހާ ސަރަހައްދަކަށް ވިއްސާރަ ކުރާނެ ކަމަށެވެ.