28 Oct 2018, 12:52
ގިނަ ފިލްމުތަކެއް ބެލުންތެރިންނާ ހަމައަށް ގެނެސްދީފައިވާ ޕްރޮޑިއުސަރު/ޑައިރެކްޓަރު މުހައްމަދު އަބޫބަކުރު (މާއެނބޫ)ގެ ކުރިޔަށް އޮތް ފިލްމު "ކާކު؟"ގެ ޝޫޓިން ކުޅުދުއްފުށީގައި ފަށައިފިއެވެ.
މީ ޕްރޮޑަކްޝަންއިން ޕްރޮޑިއުސްކުރާ އެ ފިލްމުގެ ކާސްޓާއި ކްރޫ ކުޅުދުއްފުއްޓަށް ގޮސްފައިވަނީ މި މަހުގެ 25 ވަނަ ދުވަހުއެވެ. އެ ފިލްމުގައި މައިގަނޑު ފެންނާނީ ފަސް ވަރަކަށް ކާސްޓުންނެވެ.
"ކާކު؟"ގެ ޑައިރެކްޓަރު މާއެނބޫ "ސަން" އާ ވާހަކަ ދައްކަމުން ބުނީ، އެ ފިލްމުގެ ޝޫޓިން މިހާރު ފެށިގެން ކުރިޔަށް ދާ ކަމަށާއި ފިލްމު އަންނަ އަހަރުގެ ތެރޭގައި ސިނަމާ އަށް ގެންނަން މަސައްކަތް ކުރަމުންދާ ކަމަށެވެ.
"އަޅުގަނޑު މި މަސައްކަތް ފެށީ އިރާދަކުރެއްވިއްޔާ އަންނަ އަހަރު ފިލްމު ސިނަމާ އަށް ގެންނަން،" މާއެނބޫ ބުންޏެވެ.
ފިލްމު "ކާކު؟" ގެ ޝޫޓިންގެ ތެރެއިން...
މާއެނބޫ ބުނީ، ފިލްމުގެ ހުރިހާ މަންޒަރެއް ނެގުމަށް ހަމަޖެހިފައިވަނީ ކުޅުދުއްފުށީގައި ކަމަށާއި ވިހި ވަރަކަށް ދުވަހުގެ ތެރޭގައި ފިލްމުގެ ޝޫޓިން ނިންމާލެވޭނެ ކަމަށް ބެލެވޭ ކަމަށެވެ. އެ ފިލްމުން ކުޅުދުއްފުށީގެ ބައެއް މީހުން ވެސް ފެންނާނެ ކަމަށް މާއެނބޫ ބުންޏެވެ.
"ކާކު؟" އަކީ ބިރުވެރި ހާދިސާ ތަކެއްގެ މައްޗަށް ބިނާކޮށް ހަދާ ފިލްމެކެވެ. ފިލްމުން އަލަށް ތައާރަފްވާ ތަރިން ވެސް ފެންނާނެއެވެ.
"މި ފިލްމުން އަލަށް ތައާރަފްވާ ތަރިން ވެސް ފެންނާނެ، ބޮޑު ކާސްޓެއް ނޫނަސް ފިލްމީ ދާއިރާގަ ތަޖުރިބާ ހުރި ތަރިން ފެންނާނެ،" މާއެނބޫ ބުންޏެވެ.
އެ ފިލްމުގެ ލީޑު ރޯލުން އިބްރާހިމް ސޮބާހު އާއި އިރްފާނާ އިބްރާހީމް ގެ އިތުރުން ހާމިދު އަލީ ވެސް ފެނިގެންދާނެއެވެ. އޭގެ އިތުރުން ޝާފިއު މުހައްމަދު އަދި ފިލްމީ ދާއިރާ އަށް މުޅިން އަލަށް ތައާރަފްވާ ބަތަލާ އެއްގެ ކުޅަދާނަ އެކްޓިން ވެސް އެ ފިލްމުން ފެންނާނެ ކަމަށް މާއެނބޫ ބުންޏެވެ.
މާއެނބޫގެ އެންމެ ފަހުން ރިލީޒްވީ މިދިޔަ އަހަރު ނެރުނު ފިލްމު "ނޭދެން ވަކިވާކަށް" އެވެ.