މެމްބަރު އަލީ ހުސައިން ޑީޖޭއޭ އަށް ހާޒިރުވުމަށް އަންގައިފި

10 Oct 2018, 10:14

ރައްޔިތުންގެ މަޖިލިސް ކެންދޫ ދައިރާ މެމްބަރ އަލީ ހުސައިން ޑިޕާޓްމެންޓް އޮފް ޖުޑިޝަލް އެޑްމިނިސްޓްރޭޝަން (ޑީޖޭއޭ) އަށް ހާޒިރުވާން އަންގައިފި އެވެ.

ގާނޫނީ ވަކީލް ކަން ވެސް ކުރައްވަމުން ގެންދަވާ އަލީ ހުސައިން ޑީޖޭއޭ އަށް ހާޒިރުވާން އަންގައިފައިވާ ސިޓީ އެއް އޭނާ ވަނީ ޓްވީޓް ކުރައްވައިފަ އެވެ. ސިޓީ ގައި ބުނެފައި ވަނީ ސުޕްރީމް ކޯޓުގެ ބޭނުމަކަށް މިއަދު ހެދުނު 9:00 އަށް ހާޒިރުވުމަށެވެ. ނަމަވެސް ހަޒިރުވާން ޖެހޭ ބެނުމެއް ސިޓީގައި ބުނެފައި ނުވެ އެވެ.

"ސުޕްރީމް ކޯޓަށް ހާޒިރުވުމަށް އަމުރެއް ލިބިއްޖެ. ހީވަނީ އަނެއްކާ ވެސް ސަސްޕެންޑް ކުރަން އުޅެނީހެން،" އަލީ ހުސައިން އެ ސިޓީ ޓްވީޓް ކުރުމަށް ފަހު ވިދާޅުވި އެވެ.

ސުޕްރީމް ކޯޓުގެ ހުރުމަތް ކެނޑޭ ފަދަ ގޮތަކަށް ވާހަަދައްކާފައިވާ މައްސަލައެއް ތަހުގީގު ކުރަމުން ދާތީ އެ މައްސަލަ ނިމެންދެން، މިދިޔަ މާޗް މަހު ވެސް އަލީ ހުސައިންގެ ވަކާލާތު ކުރުމުގެ ހުއްދަ ޑީޖޭއޭ އިން ސަސްޕެންޑް ކުރި އެވެ. ނަމަވެސް ޑީޖޭއޭ އިން އޭގެ ހަތަރު މަސް ފަހުން އެ ސަސްޕެންޝަން އުވާލާ އަލުން ވާކާލާތު ކުރުމުގެ ހުއްދަ އަލީ ހުސައިން އަށް ދިނެވެ.