07 Oct 2018, 14:45
ނިމިދިޔަ ރިޔާސީ އިންތިހާބުގެ ނަތީޖާ އަމިއްލަ އެދުމުން ފުރިފައިވާ މަދު ބަޔަކު ފިޔަވައި ދިވެހި ހުރިހާ ރައްޔިތުން ގަބޫލު ކޮށްފައިވާ ކަމަށް ޖުމްހޫރީ ޕާޓީގެ ލީޑަރު އަދި އިންތިހާބީ ސަރުކާރުގެ ކޯލިޝަން ޕާޓުނަރު ގާސިމް އިބްރާހިމް ވިދާޅުވެއްޖެ އެވެ.
ކުރީގެ ރައީސް މައުމޫނު އަބްދުލްގައްޔޫމާ ބައްދަލު ކުރެއްވުމަށް ފަހު މިއަދު ނޫސްވެރިންނާ ވާހަކަފުޅު ދައްކަވަމުން ގާސިމް ވިދާޅުވީ ރިޔާސީ އިންތިހާބުގެ ނަތީޖާ މުޅީ ދުނިޔެ ބަލައިގަނެއްފައިވާ ކަމަށެވެ. އަދި ރައީސް އަބްދުﷲ ޔާމީން އަބްދުލްގައްޔޫމުގެ ރަނިންގް މޭޓް ޑރ. މުހައްމަދު ޝަހީމް އަލީ ސައީދު ވެސް ނަތީޖާ ގަބޫލުފުޅު ކުރެއްވި ކަމަށް ގާސިމް ވިދާޅުވި އެވެ.
" ތިމަންނަ އެހާ އަވަހަށް ބަލި ގަބޫލުކުރާ މީހެއް ނޫނޭ ރައީސް ޔާމީން ވިދާޅުވިޔަސް. ބަލިވީމާ ދެން ޖެހޭނީ ބަލި ގަބޫލުކުރަން. ބަލި ގަބޫލު ނުކުރަންޏާ ދެން އޮތް މަރުހަލާއަކަށް ވެސް ވާނެ. ނަސޭހަތާއެކީގައި އަޅުގަނޑު ދަންނަވާނީ މަނިކުފާނުއޭ ތީ ވަރަށް ބޮޑު ގޯހެކޭ." ގާސިމް ވިދާޅުވި އެވެ.
ގާސިމް ވިދާޅުވީ ބަލި ގަބޫލު ނުކޮށް ގޮތް ދޫނުކުރައްވައި ހުންނެވި ކަމަށް ވިޔަސް މުޅީ ރައްޔިތުންގެ ނިންމުން ބޮލާލާ ޖެހޭ ވަރުގެ ބާރެއް އެއްވެސް އިންސާނަކަށް ނުލިބޭ ކަމަށެވެ. އިންތިހާބުގެ ފަހުން އަދުލު އިންސާފުގެ ދާއިރާގައި ކަންކަން ހިނގަމުން ދާ ގޮތުން މިހުރިހާ ދުވަހު އެ ދާއިރާ އޮތީ ކާކުގެ ނުފޫޒެއްގެ ދަށުގައި ވަރަށް ރަނގަޅަށް ސާފުވާ ކަމަށް ގާސިމް ވަނީ ވިދާޅުވެފަ އެވެ.
ރައީސް މައުމޫނު ވިދާޅުވީ އިންތިހާބީ ރައީސް އިބްރާހިމް މުހައްމަދު ސޯލިހު (އިބޫ) ވާދަކުރެއްވީ އެމަނިކުފާނު ހިމެނޭ ގޮތަށް ހަތަރު ޕާޓީގެ ފަރާތުން ކަމަަށެވެ. އަދި އިންތިހާބު ކާމިޔާބު ކުރެވުނީ ހަތަރު ޕާޓީގެ ގުޅުމުގެ ވަރުގަދަ ކަމުން ކަމަށް ވެސް ރައީސް މައުމޫނު ވިދާޅުވި އެވެ.
މިއަދު ގާސިމާ އެކު ބޭއްވި ބައްދަލުވުމުގައި ކުރިއަށް އޮތް ތަނުގައި ކަންތައްތައް ގެންދާނެ ގޮތަކާއި މެދު މަޝްވަރާ ކުރެއްވި ކަމަށް މައުމޫނު ވިދާޅުވި އެވެ.
"އަޅުގަނޑު ދެކޭގޮތުގައި މި ކޯލިޝަން ވަރުގަދަކޮށް ކުރިއަށް ދިއުމަކީ ވަރަށް މުހިންމު ކަމެއް. އަޅުގަނޑުމެން މި އުފައްދަނީ ވަކި ޕާޓީއެއްގެ ސަރުކާރެއް ނޫން. މި އުފައްދަނީ މި ކޯލިޝަންގެ ސަރުކާރެއް." ރައީސް މައުމޫނު ވިދާޅުވި އެވެ.
މައުމޫނު ވިދާޅުވީ ކޯލިޝަނުގެ ސަރުކާރެއްގައި ވަކި މީހަކު ވަކި ވިސްނުމެއްގައި ހުރީމަ އަނިޔާއެއް ދިނުމެއް ތަފާތު ކުރުމެއް ނޯންނާނެ ކަމަށާއި ވަކި މީހަކަށް ތަފާތުކޮށް ކަންތައްތަކެއް ނުކުރާނެ ކަމަށެވެ.
ރައީސް ޔާމީން ސަރުކާރުގެ ފުރަތަމަ ނައިބު ރައީސް ޑރ. މުހައްމަދު ޖަމީލު އަހުމަދު ވެސް މިއަދު ވަނީ ރައީސް މައުމޫނާ ބައްދަލު ކުރައްވައިފަ އެވެ. ތިން އަހަރަށް ވުރެ ގިނަ ދުވަހު އިނގިރޭސި ވިލާތުގައި ދިރިއުޅުއްވުމަށް ފަހު ޖަމިޅު ރާއްޖެ ވަޑައިގަތީ އިއްޔެގެ ވަގުތެއްގަ އެވެ.