04 Oct 2018, 10:41
މިދިޔަ ހުކުރު ދުވަހު ޕީޕީއެމް އިން ބޭއްވި "އަދަޔާ ހިލާފު ކޮންގްރެސް" ބަލައި ނުގަތުމަށް އިލެކްޝަން ކޮމިޝަން (އީސީ) އިން ނިންމައިފި އެވެ.
އިސީ އިން މިހެން ބުނެފައި ވަނީ އެ ކޮމިޝަން އިން އިއްޔެ ކޮށްފައިވާ ޓްވީޓެއްގަ އެވެ. އީސީ އިން ބުނީ ޕީޕީއެމްގެ ގައުމީ ޖަލްސާ ބަލައިނުގަތީ އިޖުރާއަތްތަކާ ހިލާފަށް އެ ޖަލްސާ ބާއްވާފައިވާތީ ކަމަށެވެ.
އީސީ އިން މި ގޮތަށް ނިންމާފައި މިވަނީ އުސޫތަކާ ހިލާފަށް ބޭއްވި ޖަލްސާއެއް ކަމަށް ބުނެ ޕީޕީއެމްގެ ގައުމީ ޖަލްސާ ބަލައި ނުގަތުމަށް އެދި އެ ޕާޓީގެ ކުރީގެ ރައީސް މައުމޫން އަބްދުލްގައްްޔޫމް އީސީ އަށް ސިޓީއެއް ވެސް ފޮނުވާފައި ވަނިކޮށެވެ.
އިއްޔެ ނޫސްވެރިންނާ ވާހަކަ ދައްކަވަމުން ކުރީގެ ރައީސް މައުމޫން ވިދާޅުވީ ކޮންގްރެސް ބޭއްވީ ޕާޓީގެ އަސާސީ ގަވާއިދާ ހިލާފަށް ކަމަށް ވަތީ ކޮންގްރެސް ގަބޫލު ނުކުރާ ކަމަށެވެ.
މިޑިއާ ނުވައްދައި ބޭއްވި ޕީޕީއެމްގެ "އަދަޔާ ހިލާފު ކޮންގްރެސް"ގައި އެ ޕާޓީގެ ރައީސަކަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމު ވަނީ އިންތިޚާބުކޮށްފަ އެވެ. އެޕާޓީގެ ނައިބު ރައީސްގެ މަގާމަށް ހަތަރު ބޭފުޅަކު އަދި ކައުންސިލަށް 20 މެންބަރުން ވެސް ކޮންގްރެސްގައި އިންތިޚާބު ކޮށްފައިވެ އެވެ.
ޕީޕީއެމްގެ ކޮންގްރެސް ބަލައިނުގަތުމަށް ނިންމާފައި ވަނީ އެ ޖަލްސާއާ ގުޅޭގޮތުން ކުރީގެ ރައީސް މައުމޫން އިލެކްޝަންސް ކޮމިޝަނަށް ޝަކުވާ ހުށަހަޅުއްވާފައި ވަނިކޮށެވެ.
އެގޮތުން ގައުމީ ޖަލްސާއަށް ފޮނުވާނެ މީހުން ގޮފިތަކުން ހޮއްވަވާފައި ނުވާ ކަމުގެ ޝަކުވާ އާއި ގިނަ ގޮފިތަކަށް ގައުމީ ޖަލްސާ ބާއްވާކަން އަންގާފައިނުވާކަމުގެ ޝަކުވާ ލިބިފައިވާ ކަމަށް ރައީސް މައުމޫން އިލެކްޝަންސް ކޮމިޝަނަށް ފޮނުވި ސިޓީގައިވެއެވެ.